И КЫПТІС ЛОВ ЮГЗЬӦДАНІН
«Парма гор» газет юӧртліс нин миян районса Габов грездын татчӧс фронтӧвикъяслы сиӧм Георгий Победоносецлысь часовня кыпӧдӧм йылысь. Медбӧръя юӧрӧн вӧлі сійӧ, мый искусствояслӧн республикаса гимназияысь да Зимстанса шӧр школаысь велӧдчысьяс помалісны вежа керкалы подув кисьтӧм да мунісны гортаныс, а талун юӧртам сы йылысь, мый часовняыс кыпаліс нин, сійӧс лэптісны ӧткызта керъясысь Сыктывкарса стрӧитчысьяс, да кыдзи и челядьӧс колльӧдігӧн, бара чукӧртчылісны грездсаяс да кывкутысь йӧз, кодъяс отсалісны пӧртны олӧмӧ бур мӧвпыштӧмторсӧ. На лыдын вӧліны Сергей Викторович Таскаев — искусствояслӧн гимназияысь велӧдысь, вежа керка кыпӧдӧмсӧ мӧвпыштысь да та кузя став уджсӧ котыртысь, тайӧ строкаяслӧн автор — Габовын фронтӧвикъяслы пас кыпӧдӧм йылысь сёрни панысь, на йылысь книга гижысь, Гелий Иванович Логинов да Владимир Николаевич Лодыгин — Дзольса да Зимстанса юралысьяс, делӧлы асланыс позянлунъяс серти отсалысьяс.
Июль 10 лун вӧлі ыркыд, но сьӧлӧмъяс вылын вӧлі шоныд: синъяс гажӧдіс зарниӧн да лӧзӧн лӧсталысь, креста ёсь йывнас енэжӧ сетчӧм чача кодь керка, коді лоис тайӧ ичӧтик грездын медся мичаӧн, лов кыпӧданаӧн.
— Со и збыльмис мӧвпыштӧмторным, — шуис йӧз водзын С. В. Таскаев. — Ме эски, мый тадзи и лоас, сы вӧсна мый йӧзлӧн паметьыс ловъя, найӧ кутӧны вежӧраныс став меддонасӧ, сы лыдын и война вылын усьӧмъясӧс, Победа дорысьясӧс. Код дорӧ шыӧдчылі, сійӧ и отсаліс: власьтыс и йӧзыс. Торйӧн пасъя Габовысь Шучалинъяслысь семьясӧ: Андрей Васильевич быдсямапӧлӧс удж бергӧдіс медводдза лунсянь, быдтор вылӧ киподтуя. Зинаида Алексеевна пусис да пӧжасис, пывсьӧдіс да мыссьӧдіс, узьтӧдіс да чеччӧдіс. Василий пиныс — миян гимназияса велӧдчысь — астшӧтшъяяс пӧвстас вӧлі медся зіль да уджалӧ водзӧ. Колӧ на потшсьыны да краситчыны. Ставныдлы зэв ыджыд аттьӧ. Олӧй и водзӧ вежавидзӧмӧн, Енмӧс кылӧмӧн. Зинаида Алексеевна челядьлӧн локтан лунӧ аддзылӧма юсьӧс, тӧрыт вичкосӧ эштӧдӧм бӧрын кызссюв зэрис, сюйис муӧ став шогсӧ — ставыс бур вылӧ.
Бурсиисны да аттьӧалісны и мукӧдъяс, дженьыдика, медтӧдчанасӧ шуӧмӧн. Сідз, Г. И. Логинов пасйис:
— Миян овмӧдчӧминлы Габов грездын часовня кыпӧдӧм — зэв ыджыдтор. Олӧмыс сьӧкыдкодь да важсӧ помнитӧмыд, кор вӧлі нӧшта сьӧкыд, да бурӧ эскӧмыс, зэв колӧ. Ёна бур, кор эмӧсь Сергей Викторович да сы кодь водзмӧстчысь йӧз, кодъяс оз лэдзны усьны лолӧн.
Сёрнитісны и грездсаяс. Сыктывкарын важӧн нин олысь, но бӧръя кадӧ матӧ быд во волысь да чужанінас век мыйкӧ вӧчысь Августа Павловна Лодыгина шуис:
— Татшӧм мича керкаыс миян Габовын медводдза да, кӧнкӧ, медбӧръя. Мед татшӧм мичаӧн век и сулалӧ. Синъяснытӧ моз видзӧй. Овтӧм, но ён на керкаяссӧ пес вылӧ пилитанныд да сы вӧсна тадзсӧ шуа.
Шучалинъясын пызан сайын нин пукалігӧн ме юалі Григорий Изосимович Морохинлысь, кодлысь грездӧ воддза волігӧн юаси фронтӧвик бать йывсьыс:
— Часовняыс эз вӧв да йӧзыслы овсис. Удж сійӧ оз сет, сьӧм оз вай. Гашкӧ, нинӧмла и вӧлі кыпӧднысӧ?
— Шуан жӧ.
Удж кӧ оз сет да сьӧм оз вай — югзьӧдӧ лов.
Фронтӧвикъяслӧн нимъясӧн кор пӧвйыс пытшкас лоас, сэні лоӧ нимыс и батьлӧн. Сыкӧд меным лоӧ гажаджык. Тшӧтш и мукӧд фронтӧвикъяслӧн нывъяслы да пиянлы.
Часовнясӧ восьтасны Победалы 70 во тыран волӧн май 6 лунӧ, кор нимӧдӧны Георгий Победоносецӧс. Сэк кежлӧ лоӧны дасьӧсь и фронтӧвикъяслӧн нимъяса пӧв, и на йылысь книга, и вежа керка пытшкӧ колан кӧлуй да мукӧдтор. Сергей Викторович арталӧ, мый лоӧ уна йӧза чукӧртчылӧм, ӧнісянь нин мӧвпалӧ, кыдзи бурджыка ставсӧ котыртны. Сиам, мед ставыс артмас лючки, ставыс збыльмас.
12.07.2014.
