ГОРТӦ ВОЛӦМӦН

Анатолий Ефимович да Надежда Васильевна Мизевъяс ӧтув олӧны нин 45 во. Олӧм вӧлі эз му вомӧн тшакла вуджӧм кодь, чабыртліс шогыс и нюмъёвтліс радлуныс. Ставсӧ юкисны шӧрипӧв. Олісны ӧта-мӧднысӧ пыдди пуктӧмӧн да радейтӧмӧн, ӧта-мӧднысӧ видзӧдлас серти нин гӧгӧрвоӧмӧн.

Анатолий Ефимович, Габовын чужлӧм морт, лабутнӧй, уджач, зэв киподтуя, весьшӧрӧ кад оз колляв, пыр мыйкӧ вӧчӧ. Надежда Васильевна, мӧдарӧ, визув вӧраса, йӧз дорӧ сибыд да варов.

— Менам мам вӧлі пермячкаӧн, — висьталіс сійӧ. — Йӧз дорӧ сибыд, ӧти кывйӧ ӧдйӧ воӧдчысь. Пыр велӧдіс миянӧс, вит чоя-вокаӧс: некор эн ӧтдортӧй йӧзтӧ, быд локтысьӧс примитӧй ыджыд гӧсьтӧс моз.

Олӧма гозъя ӧні олӧны Зимстанын, а сідзсӧ нэм чӧжыс вӧліны Габовын.

— Зимстанӧ локтім сы вӧсна, мый тшӧкыда нин кутчысьлӧ висьӧм, а Габовын ни орчча Дзолльын бурдӧдысь абу, — водзӧ сёрнитіс ань. — Татысь сюрис оланін, а Габовын колис асланым зэв ыджыд овмӧс.

Доймӧ гозъялӧн сьӧлӧмыс, ӧд сьӧкыда шедіс стрӧитчӧмыс. Кыпӧдісны ыджыд керка, гӧгӧр пелькӧдісны да гажӧдісны, лэптісны пывсян, гид, гараж да мукӧдтор. Пыр олісны гид тыр скӧтӧн. Вӧдитісны ыджыд град йӧр. Картупельсӧ быдтылісны сы мында, мый босьтлісны 12 лунӧдз. Нӧшта вотчисны да кыйсисны. Анатолий Ефимовичлӧн вӧралӧмыс вӧлі висьӧм кодь: тулыс-арсӧ век вӧлі вӧрын. Пыр бергӧдчыліс прӧмысӧн.

— Ок и каитча, мӧскысь лэдзчысим да, — нормис сьӧлӧмыс Надежда Васильевналӧн. — Зэв йӧла вӧлі. Позис на эськӧ кыдзкӧ видзны, Василий пиӧй Габовын горт олӧ да. Чайтім, оз вермы ӧтнас овмӧссӧ бергӧдны. А ми Зимстансянь Габовӧдз быд здукӧ ветлыны ог вермӧй.

Бурдӧдысь колӧ оз сӧмын Анатолий Ефимовичлы, но и Евстолия нылыслы, коді ичӧтсянь висьлӧс, мӧд группаа вермытӧм морт. Бурдӧдысь абутӧм вӧсна медсясӧ мунӧны грездысь бокӧ. Сэсся абуӧсь лавка, клуб, пыр кадся электроэнергия.

— А ӧд водзті Габовын олӧмыс пуис, — казьтыліс Надежда Васильевна. — Челядьлӧн дзользьӧмӧн горалісны школа и сад. Зумыда уджаліс «Вычегодскӧй» госпромхоз, нималіс вӧр заптӧмӧн и скӧт видзӧмӧн.

Госпромхозын уджаліс и Надежда Васильевна, тшӧгӧдіс ӧшъясӧс. Кӧрым вӧлі тырмымӧн да скӧт тшӧгліс бура. Бур вӧлі и удждон. Но ӧкмысдасӧд вояс заводитчигӧн предприятие тупкысис. Уджтӧг эз пукав, пырис вузасьны лавкаӧ. Магазин вӧлі озыр, тӧвар вайліс ачыс, зілис, мед йӧзлы ставыс вӧлі. Надежда Васильевнаӧс унаысь бӧрйылісны сиктсӧветса депутатӧн, оліс йӧзлӧн тӧжд-могъясӧн.

Госпромхозын дыр уджаліс и Анатолий Ефимович. Нималіс бур трактористӧн. Сёрӧнджык индісны пӧрӧдчысьяслӧн бригадирӧн. Котырыс век петавліс вермысьяс лыдӧ. Зэв жалитӧ, мый ыджыд предприятие киссис да эз вермы уджавны сэні пенсияӧдз. Сы бӧрын 12 во на сетіс станцияын би.

— Вӧрын да станция вылын уджалӧм да кынмалӧм и тӧдчисны верӧслӧн дзоньвидзалун вылӧ, — жалитіс матысса мортсӧ нывбаба. — Тані олам, а сьӧлӧмным пыр ас керкаын, Габовын. Тӧвъям Зимстанын, а гожӧмсӧ коллялам гортын. Кор нин сійӧ кадыс воас? Сэні пуктысьӧмӧн, горт олӧмӧн он мудз, а шойччан да олан вынтӧ содтан.

Гижӧд дорас содтӧд шог юӧр: Анатолий Ефимович таво куліс. Зимстанысь катӧдісны гортас, Габовӧ, да дзебисны сэні.