СЫЛӦН БАЯНЫС ТУЛАСА
Кӧть вӧлі шойччан лун, Зимстанысь Василий Лютоевӧс гортсьыс эг су: мунӧма вӧрӧ. Волі мӧдысь да вӧлі зэв кыпыд лола, лӧсялӧма вӧр-ваӧ петалӧмыс.
Вӧрпытшса Габовын чужи-быдми да вӧр-ватӧгыс овны ог вермы, — висьталіс Василий Александрович. — Здук кӧ сюрас, пыр и тӧвзьыла апыштны сӧстӧм сынӧд, кывзыштны лэбачьяслысь дзользьӧм, видзӧдлыны шувгысь вӧрсӧ. Вунӧ став мудзыс да локтӧ содтӧд вын водзӧ овны да уджавны. Буретш сэки воӧны юрӧ кывъяс да музыка, артмӧ сьыланкыв. Тайӧ «висьӧмыс» менӧ босьтіс ичӧтсянь. Ыззьӧдіс асланым Ӧсип Гриша. Война бӧрын овмӧдчис гортсьыс ылӧ. Ме вӧлі квайт арӧса кымын, кор сійӧ воліс видлыны гортсаяссӧ. Ок и мичаа ворсіс гудӧкӧн! Медводдзаысь кылі посньӧдлӧмсӧ да сьӧлӧмӧй муртса эз сувт. Корлісны быд керкаӧ, гажӧдіс ставнысӧ. Ме бергалі пыр дінас, ворсӧмсӧ кывзі вом паськӧдӧмӧн. Казяліс менсьым ӧзйӧмӧс, велӧдіс, кыдзи ворсны да весиг кольліс миянӧ гудӧксӧ. Кыдзкӧ ӧдйӧ и велалі. Сёрӧнджык бать посылторгысь судзӧдіс «Беларусь» гудӧк. Эг нин лэдзлы киысь. Бать радейтіс кывзыны ворсӧмӧс да сьывны. Праздникъяс дырйи тшӧктыліс ворсны гӧсьтъяс водзын, гажӧдны найӧс. Сэсся Дина чой козьналіс баян. Нимкодьлунӧй вӧлі помтӧм. Армия бӧрын уджалі госпромхозын штатнӧй вӧралысьӧн и ӧтпырйӧ велӧдчи Сыктывкарса культпросветучилищеын культура удж котыртысьӧ.
Училище помалӧм бӧрын ӧтпырйӧ уджаліс Зимстанса культура керкаын да детсадйын. Бӧръяас 20 воысь дыр. Сэні жӧ и гӧтырыс, Елена Дмитриевна, воспитатель. Медводдза сьыланкывъяссӧ Василий Александрович сыкӧд ӧтув и лӧсьӧдаліс, сы вӧсна мый поснияслы выль коми сьыланкывъяс эз вӧвны. Елена Дмитриевна гижис кывбуръяс, а Василий Александрович лӧсьӧдіс музыка. Бӧрынджык Василий Александрович и ачыс кутіс гижны кывбуръяс, лӧсьӧдны сьыланкывъяс эз сӧмын челядьлы, но и верстьӧлы. Коркӧ да петкӧдчис «Василей» гаж вылын да пыр жӧ лоис медбуръяс лыдын. Талун медся артмӧмаӧн лыддьӧ «Мусаӧй, мамӧй», «Меным уна оз ков» да «Ыджыд мамлӧн шуд» сьыланкывъяс, кодъяс юргӧны республика пасьта. Гижас и водзӧ. Бур «висьӧмыс» оз лӧнь.
Ӧні Василий Александрович уджалӧ школаын, кӧні эм «Пӧлӧзнича» сьылан котыр. Сійӧ нималӧ оз сӧмын Зимстанын, но и районын. Зонпосниӧс велӧдӧ ворсны. Кӧсйӧ лӧсьӧдны баянӧн ворсысьяслысь котыр. Аслас баяныс Туласа, коді баянъяс пӧвстын медбур.
