БУРӦ ЭСКӦМӦН

Габовын тӧдмаси Тамара Александровна Кочановакӧд. Верӧса, челядя.

Виктор Ивановичкӧд тӧдмасьлісны Зимстанса школаын велӧдчигӧн, кӧні оліс интернатын. Школа помалӧм бӧрын и чепӧсйис верӧс сайӧ. Викторӧс босьтісны армияӧ, а Тамара колис кынӧма. Локтіс чужанінас. Армия бӧрын Габовӧ локтіс и верӧсыс. Уджалісны госпромхозын. Верӧс пӧрӧдчысьӧн, Тамара кукань видзысьӧн. Чужисны Денис, Евгений да Фаина.

Денис кык нима. Гижигӧн торксьӧмаӧсь, Александр пыдди гижӧмаӧсь Денис. Документын Денис, а ставӧн шуӧны Сашаӧн. Олӧны ас овмӧс помысь. Вӧдитӧны град йӧр, видзӧны скӧтӧс. Верӧсыс лоис инвалидӧн да став уджыс водіс аньлӧн пельпомъяс вылӧ.

— Чечча, пуся, идрася, пӧжася, дӧмся, сюрӧ кӧ кад, кыа джодждӧра. Песласигӧн да пывсян вӧдитігӧн катла уна ва. Гортын удж тырыс, кӧть эн пуксьыв, — висьталіс ань.

Фаина Кулӧмдінын. Петіс верӧс сайӧ да быдтысьӧ. Денис-Сашаӧс армияӧ нуӧмысь бӧр бергӧдісны Емвасянь. Женя кувліс. Ӧльӧксан ёна кыйсьӧ. Номсӧдлӧ бать-мамӧс зьвер и пӧтка яйӧн. Косьтасны да тырмӧ тӧвбыд. Куяс вузаласны да — сьӧм. Арнас ёна вотчӧны. Тамара Александровна ачыс уджавлӧ примитысьӧн. Век нин нажӧтка. Начкысясны да лишаланасӧ вузалӧны. Выльмӧдӧны кӧм-пась, ньӧбӧны сёян-юан.

Тані дизельсянь би сетӧны сӧмын рытнас. Сэки видзӧдӧны телевизор. Но сійӧ сӧмын дӧзмӧдӧ. Габовын, кыдз шуласны, би ни ва, а сериалъясын петкӧдчысьяс олӧны югыд да ыджыд патераясын, мичаа пасьтасьӧны, резйӧны сьӧм да с.в. Но нинӧм он вӧч, татшӧм кӧ олӧм.