ЛОИС АС МОРТӦН

Габов деревняын би сетӧ дизельнӧй электростанция. Сэні уджалысь петіс пенсия вылӧ.

— Сы местаӧ вӧлі уна вӧзйысьысь, — висьталіс энергетическӧй сетьяслӧн Кулӧмдін районса начальник А. М. Тарабукин. — Но ми босьтім А. В. Шучалинӧс. Андрей Васильевич зэв бур механизатор, радейтӧ техника, кывкутысь, оз торкав удж дисциплина, вежавидзысь морт.

Андрей Васильевич Луздор районысь. Уджаліс трактористӧн. Армия бӧрын гӧтрасис Габовса ныв Зинаида Алексеевна Логинова вылӧ, коді училище бӧрын уджаліс вурсьысь-примитысьӧн. 2009 воын локтісны овны Зимстанӧ. А. В. Шучалин пырис вӧр лэдзан предприятиеӧ, бара пуксис трактор вылӧ. Бӧрынджык, кыдзи ыджыд опыта механизаторлы, вичмӧдісны финскӧй техника. Но кор тӧдмаліс, мый А. Е. Мизев пыдди Габовса би сетанінӧ колӧ уджалысь, вӧзйысис сы местаӧ. 2008 вося ноябрын кайис Габовӧ да овмӧдчис тесьтыслӧн керкаӧ.

— Менам тесьт — зэв шань морт. Ӧтлаын кыям чери, ветлам вӧрӧ. Алексей Александрович сетіс меным весиг вӧдитны ассьыс ӧти лэч туй. Гортӧй ӧні тані. Тані менам семья. Дерт, чужанінӧ гежӧдика ветлам жӧ.

Зинаида Александровналӧн да Андрей Васильевичлӧн куим челядь. Тӧвнас гозъя сӧмын кыкӧнӧсь. Асшӧр олӧма Зимстанын Аня. Гожӧм кежлӧ локтӧны гортӧ Павел да Василий, кодъяс велӧдчӧны на.

— Ми шуим крепыда вужъясьны татчӧ, — висьталӧны гозъя. — Майбыр тані овнысӧ. Сӧмын эн дышӧдчы. А весь пукавны миянлы абу кивыв. Колӧ кыкнан зонсӧ велӧдны, кок вылӧ сувтӧдны. Ӧд ми олам челядь ради.