ВЕРӦС БӦРСЯ

Госпромхоз бырӧм бӧрын Габов грездса уна олысь шуд корсьны лэччис Зимстанӧ. Ӧткымынӧн збыльысь сійӧс аддзисны да кольччисны овны дзикӧдз. Но вӧліны и сэтшӧмъяс, кодъясӧс бӧр кыскис чужанінӧ. Медводз бать-мам керкаӧ овны локтіс Андрей Павлович Лютоев, коді посёлокын вӧлі куим во, уджаліс ПМК-ын, кыпӧдіс сиктсӧветлысь керка. Эштӧм бӧрас шуис гӧтырыслы, мый бӧр каяс Габовӧ, оз вермы овны сэтчӧс вӧр-ватӧг.

Сыкӧд и кӧсйи аддзысьлыны, но гортас эз лӧсяв, мунӧма вӧрӧ. Висьтасис гӧтырыс — Рита Степановна:

— Ачым ме Улыс Вочысь. Ӧндрейкӧд ӧтлаын велӧдчим Зимстанса шӧр школаын, олім ӧти интернатын. Сэки эг ёртасьӧй, но армия бӧрас локтіс Улыс Вочӧдз да корасис. Ме петі сы сайӧ. Локті Габовӧ.

Первойсӧ вӧлі гажтӧм, но дорйис удж. Лӧсьӧдім скӧт да гажтӧмтчыны лоис некор. Олам тані матӧ 20 во нин да миян мӧд мӧс да мӧд вӧв нин. Вӧвсӧ быдтім чаньсянь. Сійӧн вӧчам став удж: гӧрам, пуктам турун, ваялам пес, новлам муяс вылӧ куйӧд.

Габовын сьӧм босьтан удж абу. Рита Степановна сулалӧ уджӧн могмӧдан районса шӧринын, но сьӧмсӧ вичмӧдӧны зэв этша. Верӧсыс — уджтӧмалысь жӧ. Кор деревня дорын заптӧны вӧр, медасьлӧ сэтчӧ. Ӧні некод абу. Рита Степановна чукӧртіс став документсӧ, медым верӧсыс сувтіс учёт вылӧ, но сійӧ оз кӧсйы, кӧть и лэччылӧ могъясӧн Кулӧмдінӧдз. Яндзим пӧ верстьӧ мортлы дась сьӧмсӧ босьтны.

А сьӧм колӧ, ӧд кыкнан нывныс — Людмила и Алёна — велӧдчӧны.

Андрей Павлович кӧсйӧма локны сёр рытын. Виччысьны кадыс эз вӧв. Снимайті гӧтырсӧ, нывсӧ да Звёздочкаӧс.