ГОРТАС ВОИС БӦР

Вӧлі велӧдысьӧн, а лоис, позьӧ шуны, фермерӧн. Василий Иванович Морохинлӧн карта вылын вӧв, куим мӧс, кык вося ӧш, ялавич. Дерт, том дырйи эз куж мӧвпыштлыны, мый лоас татшӧм ыджыд овмӧс.

Коми пединститутлысь физико-математическӧй факультет помалӧм бӧрын уджаліс Зимстанса школаын. Специальносьт серти велӧдысьлӧн места эз вӧв да пуктісны физкультура велӧдысьӧн. Шойччан лунъясӧ тӧвзьыліс чужанінас. Синсӧ пуктіс лавкаын вузасьысь Валентина вылӧ. Отпуск дырйи тӧдмасис бурджыка. Ӧтлаасисны да овмӧдчисны Зимстанӧ. Тані и чужис Володя. Сыктывдін районса Ыбын оліс Полина чойыс. Ошкис сэні олӧмсӧ да корис дзикӧдз вылӧ. Школаӧ буретш коліс физкультура велӧдысь.

Ыбын олігӧн чужис Иван. Отпуск пыр коллялісны Габовын, отсалісны бать-мамлы пуктыны турун. Бурпӧт и кыйсьыліс. Кор батьыс висьмис, чужанінас семьяыскӧд локтіс пыр кежлӧ. Ветлӧдліс уджавны вахтаӧн, а гӧтырыс пияныскӧд бергӧдіс горт овмӧс. Пыр олісны скӧтӧн.

Ӧні Василий Иванович пенсия вылын. Скӧтысь лэдзчысьны оз мӧвпав. Ӧд сійӧ вердӧ и юкталӧ, кӧмӧдӧ и пасьтӧдӧ. Ыджыдысь ыджыд муяс, паськыд видзьяс.

Зэв зільӧсь пиян. Володя служитіс Чечняын. Ӧні уджалӧ вахтаӧн. Бать-мам кодь жӧ зіль и Миша.

— Олӧм вылӧ ог элясьӧй. Ас овмӧсӧн, кыйсьӧм-вӧралӧмӧн да пенсия босьтӧмӧн овсьӧ. Тырмӧ ставыс. Вӧлі эськӧ зэв бур, сюрис кӧ водзмӧстчысь морт да Габовын восьтіс пилорама. Уджач да киподтуя йӧз эмӧсь. Колӧ клуб, мед вӧлі кӧні, кыдзи водзті, ӧтув гажӧдчыны сиктсаяслы. Эска, олӧмыс Габовын оз кус. Ме моз жӧ ӧткымынӧн локтісны чужанінас. Сідзкӧ, миян аскиа луныс эм, — кыпыд руӧн висьталіс Василий Иванович.