ТАНІ ОЛӦМ ОЗ КУС
И. Л. Жеребцовлӧн «Кӧні тэ олан» книгаын пасйӧма: «Габов — Кулӧмдін районса Дзоль сиктсӧветын деревня. Чужис 1859–1881 воясын. Казьтыштӧма 1881 вося пасйӧдын Керчомъя вӧлӧсьтса Габовская деревняӧн. 1892 воын сэні вӧлі 41 олысь (20 мужичӧй да 21 нывбаба).
1916 воын пырис Воч вӧлӧсьтӧ. Вӧлі 12 овмӧс, 64 олысь (28 мужичӧй да 36 нывбаба). 1926 воын Габовын вӧлі 19 овмӧс, 80 олысь (39 мужичӧй, 41 нывбаба). 1930 воын пырис Дзоль сиктсӧветӧ. Йӧз век содіс, но кольӧм нэмся сизимдасӧд-кӧкъямысдасӧд воясын кутіс чинны, сы вӧсна мый ыджыдджык удждонла йӧз мунісны Пруптскӧй леспромхозлӧн посёлокъясӧ. 1970 воын кӧ Габовын оліс 126 морт, то 1979-ын — 72, 1989-ын — 41.
Чужан му туялысь А. А. Панюков лыддьӧ, мый деревня артмис Перым муысь войвылӧ Дзоль да Воч сиктъяс пыр нянь петкӧдан туй вылын. Тані и излісны няньсӧ Воч ю вылӧ лэптӧм мельничаын.
Ме (В. Лодыгин) чайта, мый деревнялы подув, вӧр керка лэптӧмӧн, пуктісны Перым муса (сійӧ и ӧні административнӧй граница серти дзик орччӧн) кыйсьысьяс. Воч юлысь нимсӧ колӧ гӧгӧрвоны, кыдзи Перым мулысь войвывладорсянь водзсӧ (водзладорсӧ). Дырнад «водз» пыдди артмӧма «Воч». СССР киссьӧм, олӧм пузувтчӧм да удж бырӧм бӧрын буретш да сэтчӧс вӧр участокъясысь ӧткымынъяс локтісны Габовкӧд орчча Дзолльӧ. Таладорын и сёрниыс мӧдджык. Лодыгин ов (а тані водзті кызвыннас вӧліны Лодыгинъяс) — Перым муса. Сэтысь жӧ Родыгинъяс, Гущинъяс, Вавилинъяс да с.в.
Колӧ эськӧ шуны оз Габовӧн, а Габӧӧн, сы вӧсна мый, став сертиыс, артмӧма кыйсьысь Габӧ нимсянь. Кыдз висьталӧны олӧма йӧз, сылӧн вӧлӧма куим пи, кодъяс и паськӧдӧмаӧсь вужсӧ. Гӧтыръясӧн босьтӧмаӧсь орчча сиктъясысь. Бӧрынджык татчӧ (зьвер-пӧткаа озыр парма вӧсна жӧ) катісны Воч юӧд Вылыс Вочса мужичӧйяс. Найӧ нин гӧтрасисны Габовса нывъяс вылӧ.
Колхозӧдз, кыдзи и быдлаын, олісны единоличникъясӧн. Удж пыдди пуктысьяс олісны эз гӧля, лэптылісны весиг кык судта керкаяс. Налӧн эбӧсыс да пӧсьыс олӧ и талун турун пуктан видзьяслӧн нимъясын: Семӧ кырӧм, Иван видз, Висар видз, Пуд виям (и татшӧм ним вӧлі), Павел вис весьт, Саватей ёль дор да с.в.
Кыдзи и быдлаын, «Пятилетка» колхозын да бӧрынджык Свердлов нима колхозлӧн бригадаын быдтісны нянь, видзисны скӧт, лэдзисны вӧр. Госпромхоз котыртчӧм бӧрын нянь быдтӧмысь эновтчисны, сэсся и скӧт видзӧмысь. Талун олӧны ас овмӧс весьтӧ да вӧр-ва помысь.
Водзті кӧ вӧліны начальнӧй школа, медпункт, клуб, Воч сельполӧн лавка, то ӧні нинӧм абу. Сёян-юанӧн да шыӧдчӧм серти мукӧдторйӧн могмӧдӧ Зимстанса предприниматель Гелий Алексеевич Носковец. Дзоньвидзалун видзӧдлыны волӧ сэтысь жӧ фельдшер Татьяна Васильевна Лютоева.
Талун Габовын 11 овмӧс, 29 олысь. Видзӧны вит мӧс, сы мында жӧ вӧлӧс, ыжъясӧс. Му-видз уна да пуктысьӧны оз сӧмын габовсаяс, но и дзольсаяс да зимстансаяс.
Габовлы сиӧм книгаын казьтыштам нимъяссӧ налысь, кодъяслӧн луныс вӧлі уджа, гажыс кыпыд сьыланкывъя, челядьныс пӧтӧсь, ӧдзӧсныс быдӧнлы восьса, киныс отсӧг сетана. Таладор югыдысь мунӧмъясӧс тшӧтш босьтӧмӧн, тайӧ гозъяяс: Иван Васильевич да Лидия Андреевна, Прокопий Никитьевич да Елена Ивановна, Пуд Никифорович да Анна Федосеевна, Фёдор Никифорович да Мария Васильевна, Павел Иванович да Парасковья Иосифовна, Степан Петрович да Парасковья Никифоровна, Алексей Иосифович да Агафья Николаевна, Варфоломей Иосифович да Олимпиада Васильевна, Матвей Фёдорович да Александра Андреевна, Григорий Петрович да Мария Васильевна, Никита Прокопьевич да Мария Васильевна, Николай Степанович да Мария Ивановна, Василий Фёдорович да Земфира Николаевна, Иван Степанович да Агния Васильевна, Дмитрий Ефимович да Анна Ивановна, Александр Варфоломеевич да Агния Матвеевна, Василий Матвеевич да Татьяна Прокопьевна Лодыгинъяс, Иван Никифорович да Агафья Ивановна, Сергей Никифорович да Матрёна Яковлевна, Павел Андреевич да Окулина Ивановна, Александр Андреевич да Анна Владимировна Лютоевъяс, Иван Изосимович да Анна Ивановна, Григорий Изосимович да Мария Петровна, Николай Иванович да Анна Андреевна Морохинъяс, Алексей Александрович да Анастасия Павловна Логиновъяс, Анатолий Ефимович да Надежда Васильевна Мизевъяс.
Шуам и найӧс, кодъяс бергӧдчисны верӧсъястӧг, но ӧтувъя уджӧ пайсӧ пуктісны эз этшаджык. Тайӧ Васса Егоровна, Евдокия Виссарионовна, Клавдия да Анастасия Петровна, Екатерина Викуловна, Анна Фёдоровна Лодыгинаяс, Анна Егоровна Логинова да мукӧдъяс.
Позьӧ лыддьӧдлыны зэв на унаӧс, но ставсӧ пасйыны он вермы. Содтам сӧмын, мый Габовса пиян повтӧмӧсь вӧліны Великӧй Отечественнӧй войналӧн фронтъяс вылын. Бӧрсӧ эз локны дас ӧтиӧн. Иван Дмитриевич Лодыгинлӧн пуктісны юрсӧ витнан пиыс.
Сиктсаяс, асланыс ныв-пилы бурджык олӧм кӧсйӧмӧн, велӧдісны найӧс училищеясын, техникумъясын, вузъясын да лоисны трактористъясӧн, водительясӧн, агрономъясӧн, воспитательясӧн, велӧдысьясӧн, культура юкӧнын уджалысьясӧн да с.в.
Габовсаяс пиысь унаӧн тӧдсаӧсь абу сӧмын ас вожын да районын, но и республикаын, странаын, йӧз муын. «Асъя кыа» государственнӧй ансамбльын ас кадӧ сьыліс Августа Павловна Лодыгина, уна книга нин лэдзис да лӧсьӧдіс сьыланкыв нималана гижысь да композитор Василий Григорьевич Лодыгин, Коми республикаысь Верховнӧй Сӧветса депутатӧн вӧлі да уджавліс сэні юрист Григорий Алексеевич Лодыгин, зэв сьӧлӧма сьыланкывъяс тэчӧ Василий Александрович Лютоев, Помӧсдін вожса коммунальнӧй овмӧсӧн дыр веськӧдліс Валерий Алексеевич Логинов.
Воддза серти Габов чиніс керка и йӧз лыдӧн, но олысьяс олӧны да эскӧны, мый тані олӧм оз кус, аскиа лун лоӧ бурджык.
