ЛУДАН ВИСЬӦМ

Кутшӧм тайӧ висьӧм.

Лудан висьӧм — зэв вуджысь висьӧм. Висьысьыслӧн вывті ёна лудӧ кучикыс; висьысьыс пыр зільӧ дугӧдны лудӧмсӧ гыжъясьӧмӧн.

Висьмӧны лудӧмӧн няйта олысь йӧз пиын, кӧні шоча пывсьӧны, шоча вежлалӧны белльӧсӧ да дурка олӧны.

Висьӧмыс заводитчӧ сідзи: мортыслӧн кучикыс кутас зэв ёна лудны (медвойдӧрсӧ киясасджык), чеччаласны посньыдик лӧм кодьяс. Медъёна нин висьысьлӧн лудӧ кучикыс войнас. Висьысьыс сэки некыдзи оз вермы кутчысьны гыжъясьӧмысь, сійӧ лёкысь чашйӧ-гыжъялӧ луданінъяссӧ. Яйыс висьысьыдлӧн ставыс лоӧ гыжъя туй, висьӧмыс сэсся пыр паськалӧ.

Висьмӧдӧны тайӧ висьӧмнас ичӧтик гагъяс (клещӧн шусьӧны). Сійӧ зэв лӧсьыда тыдалӧ, видзӧдлан кӧ ыдждӧдан стеклӧ пыр. Тайӧ гагйыс олӧ да рӧдмӧ морт кучик пытшкас. Дзоньвидза морт кӧ инмӧдчылас висьысь дінӧ, сійӧ гагйыс вермӧ вуджны дзоньвидза морт вылас да висьмӧдны сійӧс. Сы кындзи, лудӧм висьӧм вермӧ вуджны тшӧтш паськӧм пыр, вольпась пыр да висьысь белльӧ пыр.