КОР ДА КЫДЗИ КОЛӦ КӦДЗНЫ ТУВСОВ КӦДЗАЯС

Тувсов кӧдза кымын водз, сымын бур кӧдзны, мед сӧмын муыс шоналӧма вӧлі. Кӧдзыд муын кӧйдыс чужӧ ньӧжйӧн, дай ӧткымын вуж йывъясыс дзикӧдз кынмывлӧны.

Рочын уналаын нин (дай кӧнсюрӧ Коми обласьтын) ӧні кӧдзӧны машинаӧн. Машинаӧн кӧдзӧм со мыйясӧн бур: ӧти-кӧ, кӧйдысыд этшаджык мунӧ; шуам, киӧн кӧдзӧмӧн кӧ мунас 3 пуд, машинаӧн — сӧмын кык, коймӧд пайыс лишалас. Мӧд-кӧ, машинаӧн вермам кӧдзны пыдӧджык либӧ вылӧджык колӧм серти. Кос му вылын кӧйдыс кӧ вылӧ веськалас, оз чуж. Сэки кӧдзан машинаыдлысь сошникъяссӧ позьӧ лэдзыштны неуна, дай кӧйдысыд пырас пыдӧджык, васӧдджыкинас. Васӧд му вылӧ кӧдзигӧн позьӧ сошникъяссӧ лэптыны, мед кӧйдысыс веськалас вылӧджык. Сэсся машинанад кӧдзигӧн ӧдйӧджык киӧн дорысь позьӧ кӧдзны.

Мыйта колӧ кӧйдыс десятина му вылӧ, урчитны веськыда он вермы; кӧдзсьӧ муяс серти да кӧйдыс серти. Шӧркодя позьӧ шуны, машинаӧн кӧдзигӧн миянын мунӧ десятина му вылӧ 12 пуд гӧгӧр весалӧм чужан тувсов кӧдза кӧйдыс. Сӧмын со мыйяс колӧ артавны кӧдзигӧн: 1) Омӧльджык кӧйдыс (ёгӧсь либӧ омӧля чужысь) колӧ кӧдзны унджык. 2) Гырысь кӧйдыс тусь посньыдкӧд абу ӧтсьӧкта, сы вӧсна гырысь кӧйдыс ковмас кӧдзны унджык посньыд дорысь. 3) Бур му вылӧ колӧ кӧдзны шочджыка, омӧль муяс вылӧ тшӧкыдджыка. 4) Унджык вожӧн петысь кӧйдыс кӧдзсьӧ шочджыка.