БЫДӦНЛЫ КОЛӦ ТӦДНЫ ЗАКОНЪЯС

Ставроссияса Центральнӧй Исполнительнӧй Комитет февраль 22-ӧд лунӧ (1926ʼ воӧ) шуис Видз-му Закон Чукӧрысь 29, 30, 31, 34, 39 да 41-ӧд статьяяс видз-му кӧртымӧ сеталӧм йылысь вежлавны. Выль ногыс тайӧ статьяяссӧ лӧсьӧдіс тадзи:

29-ӧд ст. Муясыс кӧ уджавсьӧ квайт переменаӧн либӧ квайтысь унджык переменаӧн, му-видз позьӧ сетны кӧртымӧ кык перемена кост вӧдитӧм дыра кежлӧ.

Муясыс кӧ уджавсьӧ квайтысь этшаджык переменаӧн либӧ кыдзсюрӧ уджавсьӧ, лючки перемена лӧсьӧдтӧг — му-видз кӧртымӧ позьӧ сетны 12 во кежлӧ.

30-ӧд ст. — Тайӧ срокыс кольӧм бӧрын кӧ кӧртымӧ сетлӧм му-видз вылын ачыс кӧртымӧ сетысьыс кӧзяйствосӧ нуӧдны оз понды на вермыны, сэки сійӧ му-виддзыс босьтсьӧ земельнӧй обществоса запаснӧй фондӧ этша видз-муа кӧзяйствояслы сетӧм вылӧ либӧ государственнӧй запаснӧй фондӧ.

31-ӧд ст. Му-видз кӧртымӧн мукӧдлысь позьӧ босьтны сӧмын ас семьяса шленъяс вынӧн уджалӧм вылӧ. Кӧртымӧн му-видз босьтысьлы йӧзӧс медалӧмӧн уджӧдны позьӧ сӧмын Видз-му Закон Чукӧрса 39, 40 да 41-ӧд статьяяс серти.

34-ӧд ст. Видз-му кӧртымӧ сетны оз позь, кӧзяйствоыс кӧ му-видзсӧ уджалӧмысь дзикӧдз кӧсйӧ дугдыны либӧ дугдӧма нин.

Содтас. Мукӧд губерняясӧ крестьянствоын уджавны переселитчигӧн либӧ ас губерня пытшкын выль местаӧ овмӧдчыны мунігӧн му-видз позьӧ сетны кӧртымӧ кык во кежлӧ (Видз-му Зак. Чукӧр 18-ӧд статьяса содтасын лӧсьӧдӧм срок кежлӧ).

39-ӧд ст. Крестьянинлы ассьыс дай кӧртымӧ босьтӧм му-видзсӧ уджавны отсӧг вылӧ позьӧ бокиса уджалысьӧс медавны.

Уджалысьӧс позьӧ медавны либӧ видз-му гӧгӧрын торъя уджъяс нуӧдны недыр кежлӧ либӧ дырджык кежлӧ, позьӧ во дыра кежлӧ.

41-ӧд ст. Бокиса уджалысьӧс му-видз гӧгӧрын уджавны позьӧ медавны сӧмын Цен. Исп. Комитетӧн лэдзӧм временнӧй правилӧяс серти да мукӧд удж нуӧдан законъяс да распӧраженньӧяс серти.