ВИДЗӦЙ СКӦТӦС ВИСИГӦН

Скӧтыд кӧ висьмас вуджан висьӧмӧн, колӧ пырысь-пыр торйӧдны дзоньвидза скӧт дінысь висьысь скӧтӧс. Торйӧдӧм бӧрын колӧ бура весавны куйӧд, сёян дозъяс, лясни да став гидня-картаысь кӧлуйсӧ.

Висьмӧм мысти пырысьтӧм-пыр колӧ шыасьны скӧт пельшӧр либӧ врач дінӧ. Пельшӧрыс кӧ сэні абу, колӧ исполком пыр корны маті вӧлӧсьтса пельшӧрӧс.

Кулӧ кӧ скӧт вуджан висьӧмӧн, шойсӧ колӧ нуны бокӧджык (эм кӧ, скӧт кладбищеӧ) да пыдӧ гуавны. Сэтчӧ жӧ тшӧтш колӧ гуавны скӧт увсьыс куйӧдсӧ. Скӧт куланінсӧ колӧ гӧгӧр весавны — зыравны известка ваӧн да киськавны ён кунваӧн дьӧгӧдь сорӧн — бырӧдны висьӧмсӧ.

Скӧт висигӧн (ӧткодь вуджан кӧть вуджтӧм висьӧм) став крестьяналы колӧ тӧдны со мыйяс:

Висьысь скӧтӧс оз ков вӧрӧшитны, колӧ сетны шойччӧг. Карта выв да гидня мед пыр вӧлі пельк, югыд, шоныд, сӧстӧм сынӧда.

Висьысь скӧтӧс колӧ вердны бурджыка да пӧтӧс сёянӧн: бур веж турунӧн (позьӧ кӧ судзӧдны, пӧжӧм зӧрйӧн, скӧт сёркниӧн либӧ шырӧм морковӧн).

Висигӧн скӧтӧс колӧ юктавны пуӧм дэбыд ваӧн.

Ёна колӧ пелька видзны висьысь скӧтӧс, старайтны на гӧгӧр. Лечитӧм йылысь колӧ юасьны скӧт лечитысь пельшӧрлысь либӧ врачлысь да найӧн сетӧм лекарствоясӧн лечитны.

Спира Прокӧ