КЫДЗИ ДА КОДЛЫ НОРАСЬНЫ МИЛИЦИЯЫН ДА УГОЛОВНӦЙ РОЗЫСКЫН УДЖАЛЫСЬЯС ВЫЛӦ

Миян коми крестьяналы унаысь ковмылӧ милиция да уголовнӧй розыск удж вӧчӧм вылӧ норасьны, сӧмын норасьныс найӧ оз тӧдны кытчӧ да кодлы. Административнӧй юкӧд ӧні лӧсьӧдіс сы йылысь индӧдъяс да ысталіс быд вӧлӧсьтувса исполкомлы.

Сійӧ индӧдъяс сертиыс, быд морт вермӧ норасьны, милицияӧн нелючки вӧчӧм удж вылӧ кындзи, тшӧтш делӧяс нюжӧдӧмысь да кутӧмысь. Вӧлӧсьтувса милиционер да районса милиция управленньӧын уджалысьяс вылӧ позьӧ норасьны районса милиция начальниклы либӧ обласьтувса Административнӧй юкӧдӧ. Вӧлӧсьтувса милиционер вылӧ сідзжӧ позьӧ норасьны волисполкомӧ. Районса милиция начальник вылӧ норасьӧмъяс колӧ сетны Административнӧй юкӧдӧ. Быд норасьӧм позьӧ сетны гижӧмӧн либӧ висьталӧмӧн. Милиция вылӧ позьӧ норасьны тшӧтш судӧ либӧ прокуратураӧ.

Тайӧ индӧдъяс серти ӧні крестьяна ёнджыка кутісны тӧдны, кытчӧ да кыдзи норасьны милиция вылӧ. Сӧмын сійӧ индӧдъяснас (сэні гижӧма унджык) волисполкомъяслы колӧ тӧдмӧдны став йӧзсӧ ёнджыка. Крестьяналы пыр колӧ сетны норасьӧмъяс, милицияыс кӧ оз кут уджавны закон серти, нелючкиторъяс кӧ кутас вӧчны, мед миян милиционер эз лысьт вӧчны законлы паныд удж. Колӧ крестьяналы вунӧдны важ урадниктӧ, код вылӧ вӧлі он лысьт норасьны. Ӧні милиционер асланым пуктӧм морт — лёка кӧ йӧзлы уджалӧ, пыр верман вежны мӧд мортӧн.

Е.