МӦДА-МӦДЛЫ ОТСАСЯН КОМИТЕТЪЯС,

ЛӦСЬӦДЧӦЙ ГӦРӦМ-КӦДЗӦМ КЕЖЛӦ!

Матыстчӧ тулыс, воӧ кӧдзан кад. Мӧда-мӧдлы отсасян комитетъяслы ыджыд удж лоӧ нуны. Колӧ тӧдмӧдны, уна-ӧ кӧйдыс ковмас кӧдзӧм вылӧ, кодлӧн кӧйдысыс оз тырмы. Сэсся кӧйдысыс кӧ комитетас этша, колӧ водзвыв кыськӧ судзӧдны сійӧс.

Ковмас сідзжӧ тӧдмавны вӧвтӧм гӧлиник кӧзяйствояс да водзвыв думыштны, кыдз налысь муяссӧ гӧрны да кӧдзавны.

Эм кӧ вӧлӧсьтас прокатнӧй пункт, колӧ ӧні жӧ видлавны видз-му уджалан машинаяс, да кыткӧ кӧ жугалӧма, колӧ пырысьтӧм-пыр жугалӧмъяссӧ лӧсьӧдавны.

Сэсся ещӧ на зэв ыджыд удж колӧ вӧчны: колӧ комитетлы кӧйдыссӧ весавны, бурмӧдны (сортируйтны), дай мед эськӧ вермисны весавны кӧйдыссӧ мӧда-мӧдлы отсасян комитетса шленъяс.

Гӧль-судзсьытӧм крестьяналы лоӧ сетны уна сикас кокньӧдъяс (льготаяс) му-видз уджалан кӧлуй прокатнӧй пунктъяс вылысь босьтігӧн да машинаяс ньӧбигӧн. Комитетъяслы колӧ зільны гӧль крестьяналы кӧйдыссӧ весавны дон босьттӧг.

Сэсся мӧда-мӧдлы отсасян комитетъяслы колӧ ёна видзӧдны, мед уджӧн сеталӧм кӧйдыс бокӧ эз мун, мед сӧмын кӧдзӧм вылӧ удждысьясыс видзисны сійӧс.

Уна вӧлӧсьтъясын мӧда-мӧдлы отсасян комитетъяслӧн эм му-видз. Комитетъяслы колӧ ёна зільны, мед комитетса муяссӧ ставсӧ вӧлі кӧдзӧма да мед эськӧ сэн кӧдзаясыс бурджыка быдмисны. Колӧ комитетъяслы ӧні жӧ чукӧртчывны да сёрнитны та йылысь. Чукӧртчылӧм вылӧ колӧ корны участокса агрономӧс да юасьны, кыдз бурджыка комитетса му-видзсӧ вӧдитны. Колӧ комитетъяслы сідз вӧчны, мед комитетса муяс вылын кӧдзаясыс быдмисны медбура, мед крестьяна сэсь велӧдчисны выль ногӧн, уна переменаӧн му уджавны. Сэсся комитетса муяссӧ колӧ кӧдзны весалӧм кӧйдысӧн, мед эськӧ крестьяна бара жӧ аддзисны бурсӧ весалӧм кӧйдыснас кӧдзӧмсьыс.

Мӧда-мӧдлы отсасян комитетъяслы оз ков вунӧдны красноармееч семьяясӧс; колӧ думыштны, кыдзи налы отсавны кӧдзан каднас. Ыджыд да уна удж мӧда-мӧдлы отсасян комитетъяслы лоӧ нуны. Колӧ ӧні жӧ заводитны вӧчны сійӧс!