1925−26 ВОСЯ БЮДЖЕТ

Сӧвет власьт медуна сьӧм видзӧ овмӧс кыпӧдӧм вылӧ

Апрель тӧлысьын Мӧскуаын чукӧртчӧ Союзса Центральнӧй Исполнительнӧй Комитетлӧн 2-ӧд сессия. Сессия видлалас да вынсьӧдас Союз республикалысь 1925−26 во кежлӧ бюджет.

Союзса Совнарком арталӧма бюджетсӧ 4 миллиард шайт вылӧ. Сэсь 504 миллион (12 прӧчент) Совнарком шуис лэдзны сиктса овмӧс да промышленносьт кыпӧдӧм вылӧ. Сэсся 1214 миллион шайт сетсьӧ туйяс понда тӧждысьысь Комиссариатлы да пошта-телеграф комиссариатлы. Сідзкӧ овмӧс кыпӧдӧм вылӧ Сӧвет правительство лэдзӧ 1718 миллион шайт (42 прӧчент став бюджетысь).

Сӧвет власьт — рабочӧйяслӧн да крестьяналӧн власьт. Сійӧ ёна тӧждысьӧ республика овмӧс кыпӧдӧм вӧсна, рабочӧйяслысь да крестьяналысь олӧм лӧсьӧдӧм да кокньӧдӧм вӧсна. Сӧвет власьт оз шыблав кытчӧсюрӧ сьӧм, рабочӧйясӧн да крестьянаӧн уджалӧм сьӧм видзӧ медколантор вылӧ.

1913 воын сарскӧй правительство школаяс вылӧ да велӧдӧм вылӧ видзліс 147 миллион шайт, таво Совнарком шуис лэдзны войтырӧс велӧдӧм Комиссариатлы 186 миллион шайт. Сідзкӧ войтырӧс велӧдӧм вылӧ Сӧвет власьт видзӧ сьӧм унджык важ серти.

Сідзжӧ дзоньвидзалун кутӧм вылӧ сар дырйи лэдзлісны сӧмын 11 миллион, Сӧвет правительство лэдзӧ 86 миллион шайт.

Сӧвет власьт лэдзӧ кӧ унджык сьӧм школаяс да больничаяс вылӧ, сійӧ кыдз вермӧ чинтӧ рӧскодсӧ служащӧйяс вылӧ. 1913 воын административнӧй учрежденньӧяс вылӧ видзӧма вӧлі 311 миллион шайт, Совнарком шуис сэтчӧ лэдзны сӧмын 230 миллион шайт.