КОЛӦ МЫНТЫНЫ УДЖЙӦЗЪЯС
Тайӧ вояснас Сӧвет власьт сетіс доза ыджыд отсӧг крестьяналы. Уджйӧзӧн вӧлі сетӧма уна кӧйдыс, машинаяс. Сэсся кооперативъяс пыр крестьяналы сетавлісны сьӧмӧн. Медся уна лэдзисны уджйӧзӧн потребительскӧй обществояс.
Видзӧдлам кӧ, унджык уджйӧзыс ӧнӧдз на мынтытӧм. Со босьтам кӧйдыс йылысь. Колян во няньяс вӧлі артмӧма шӧркоддьӧма. Позис мичаӧ мынтыны став кӧйдыс уджйӧз. Коді веськыд морт да гӧгӧрвоана, сійӧ важӧн нин мынтысис. Мукӧдыс лунысь лунӧ кыскӧ. Мый найӧ виччысьӧны? Виччысьӧны сійӧ, мый коркӧ уджйӧз дзик шыбитасны. Дерт, вӧлі кад, кор эз чорыда перйыны кӧйдысъяс.
Ӧні абу сідз. Кутасны перйыны быд кӧйдыс тув. Быдӧн тӧдӧны, мый миян обласьтын вайӧм кӧйдыс чужӧ омӧля. Сэсся выль вайӧм вылӧ колӧ сьӧм. Кытысь ми босьтам выль сьӧмсӧ? Государстволӧн быд ур пуктӧма лыдӧ. Оз вермы сійӧ помтӧг шыблавны ассьыс сьӧмсӧ. Абу на ми сэтшӧм озырӧсь. Татчӧс кӧйдыс медбура быдмӧ. Сӧмын мичаӧ мынтысьӧмӧн крестьяналӧн лоӧ водзӧ вылӧ кӧйдыс.
Сідзжӧ колӧ мынтавны мукӧд уджйӧзъяс. Вывті ёна нин соді тайӧ уджйӧзъясыс. Эмӧсь сэтшӧм кооперативъяс, кӧні став ассьыс капиталъяссӧ сеталӧма шленъяслы да вӧралысь йӧзлы. Ӧти-мӧд лавка ковмас регыд сиптыны. Потребительскӧй общество местаӧ бара вермас пуксьыны важ купеч. Омӧля жӧ ми кывзам Ленинлысь тшӧктӧмъяссӧ. Буракӧ, вунӧдім нин озыр йӧзлысь важ нартитӧмсӧ. Мӧдлім эськӧ выль туйӧд, да, тыдалӧ, лоӧ сувтны.
Лӧсьӧдлім ми кредитнӧй тӧвариществояс. Обласьт пасьта ӧні эм 46 тӧварищество. Быд вежӧра морт аддзӧ, кутшӧм найӧ вайӧны пӧльза. Быдӧн тӧдӧны, мый тӧварищество вермас сулавны да кыпӧдны миянлысь овмӧс сӧмын сэк, кор босьтӧм сьӧм крестьяна бӧр мынтасны. Видзӧдлам кӧ, мынтысьӧмыс зэв лёк. Нелямын квайт сюрс шайт срок кежлас крестьяна абу мынтӧмаӧсь. Пыр на сійӧ уджйӧзыс кыссьӧ. Тадзи оз позь.
Медся нин гырысь уджйӧзъяс потребительскӧй лавкаясӧ. Сэні уджйӧзъяс кыскысьӧ уна воӧн. Гӧгӧр кӧ арталан, лавкаяс сеталӧмаӧсь уджйӧзӧн миллион джын шайт. Асланыс капиталъяс та мында оз ло. Став тӧварсӧ лавкаяс сідзжӧ босьтӧны уджйӧзӧн. Сы вӧсна содӧ тӧварлӧн дон. Ӧнӧдз пыр на эз топӧдлывлы вывсянь. Кутасны кӧ чорыдджыка лэдзны тӧвар, сэки уна кооператив вермас сиптыссьыны.
Шуӧны, тайӧ уджйӧзъясыс пӧ соді дзик омӧль прӧмыс вӧсна. Дерт, гӧльджык йӧзлы сійӧ олӧм сьӧктӧдіс, а коді вермыштӧ, сылы зэв позис мынтысьны. Пушнина дон тайӧ вояс вӧлі ыджыд. Сэсся вӧр лэдзӧм вылын крестьяна босьтісны доза уна сьӧм.
Со босьтам ӧнія кер лэдзӧм. Нажӧткатор лои гырысьджык. Оз ков вунӧдны важ уджйӧзъяс. Ми пыр олам надеяӧн, мый локтан арӧн вермам мынтысьны прӧмысӧн. Бӧрнас казялан да — прӧмысыд пӧръялас.
Колӧ ӧні мынтысьны. Оз ков воштысьны судӧдз.
