СЮЗЯЫБСА КООПЕРАТИВ

Сюзяыб сиктын (Висер в. Кулӧмдін у.) общественнӧй лавка воссис 1918ʼ восянь. Кооператив восьтӧмӧн тшӧтш кутчысис вермасьны спекулянтъяскӧд, важ купечьяскӧд дай нуӧдіс политическӧй удж. Унаысь вӧлӧстнӧй управасянь (управаястӧ шыбиттӧдз на) волісны Висер вичко дорсянь арестуйтны сюзяыбса кооперативын уджалысьяссӧ, сӧмын эз вермыны сувтӧдны лавкалы уджсӧ. Кооператив бырӧдіс матігӧгӧрысь спекулянтъясӧс, вузасис бура, оборотыс вӧлі сылӧн бура ыджыд. Белӧйяс дырйи лавкасӧ пазӧдлісны дзикӧдз; белӧйясӧс вӧтлӧм бӧрын ньӧжйӧникӧн пондіс бара сувтны кок йылас. Колян во кооператив вӧчис мельнича, ӧні кӧсйӧ стрӧитны школа да нардом.

Сюзяыбса йӧз зэв шаньӧсь, артельнӧйӧс. Кооперативӧ пырӧмаӧсь быд керка юрысь, сӧмын озыр йӧзыс кольӧмаӧсь шленӧ пыртӧмӧсь. Колян во сюзяыбса асланыс вынӧн лӧсьӧдісны краснӧй уголок. Ӧні лӧсьӧдчӧны косьтыны нюр, сё кык десятина кымын. Олӧны йӧз Сюзяыбын зэв гӧля: нажӧткаяс абуӧсь, нянь воӧ омӧля дай муыс сиктас этша, паськӧдчыны некытчӧ — гӧгӧр кос лыа либӧ нюр да тод.

Л. Дедов.