ГИЖСЯЛӦЙ ДОБРОВОЛЬНӦЙ ОБЩЕСТВОЯСӦ!

Коми крестьянин, отсав Сӧвет Республикалы выль олӧм лӧсьӧдны!

Революция бӧрын уджалысь йӧз чорыда босьтчисны лӧсьӧдны выль оласног, кыпӧдны овмӧс. Быдлаӧ ковмис сьӧм. Уджалысь йӧз ӧтлаасисны ас костас да лӧсьӧдісны добровольнӧй обществояс. Сэтшӧм обществоыс лӧсьӧдӧма зэв уна: Авиахим, МОПР, Бырӧдӧй пемыд лун нима общество, Безбожник да мукӧд обществояс.

Обществояс 8 во чӧж ёна паськалісны Сӧвет Республика пасьта, быдлаын ӧні уджалӧны обществояслӧн ячейкаяс. Миян Коми обласьт пасьта быдлаын жӧ, быд вӧлӧсьтын, быд учрежденньӧын эм кутшӧмкӧ обществолӧн ячейка. Сӧмын обществоыс зэв нин уна лои, мукӧд шленыс гижсялӧма нёль-ӧ-вит обществоӧ, дерт жӧ, сэтшӧм гижсялӧмысь пӧльзаыс ньӧти абу. Сэтшӧм шленъясыс сӧмын мынтӧны шленскӧй взносъяс, а некутшӧм удж оз нуны. Сы вӧсна ӧні Коми обласьт пасьта мунӧ шленъяссӧ обществояссьыс выль пӧв гижалӧм (перерегистрация). Гижалӧм бӧрын обществоясын кольӧны сӧмын колан йӧз, уджалысь йӧз. Ӧнӧдз шоч крестьянин вӧлі пырӧма добровольнӧй обществоӧ, выль гижсялӧм бӧрын шленъяс вермасны паськӧдны обществосӧ, чукӧртны выль шленъясӧс крестьяна пиысь. Крестьяна гижсяласны обществоясӧ, сӧмын налы кужны колӧ висьтавны, кутшӧм бур вайӧ обществоясыс.

Сӧмын сэк выль оласног регыд лоӧ, крестьяна кӧ тшӧтш босьтчасны отсавны Сӧвет Республикалы выль олӧм лӧсьӧдны. Коми крестьяна, гижсялӧй добровольнӧй обществоясӧ.