ОБСОЮЗ ОТСАЛІС КРЕСТЬЯНАЛЫСЬ ОВМӦС КЫПӦДНЫ
Видз-му уджалан кӧлуй Обсоюз заводитчис разӧдны крестьяна пӧвстын 1923ʼ восянь. Сійӧ кадсяньыс Обсоюз уна буртор вӧчис крестьяналы.
1923ʼ восяньыс аслас склад пыр да контораяс пыр Обсоюз вузавліс став уездъясӧ 700 кымын плуг, 50 кӧрт пиня, 30 кымын вартан машина, 10 «Триер» нима кӧйдыс весалан машина да уна мукӧд пӧлӧс кӧйдыс весалан машина, 25 кӧдзан машина, сэсся уна йӧв вӧчан да мукӧд пӧлӧс машинаяс.
1923 воӧ жӧ Обсоюз ньӧбис сельскокӧзяйственнӧй выставка вылысь 4 племеннӧй порсьпи да сетіс найӧс Айкатыла районӧ рӧд бурмӧдӧм вылӧ да порсь рӧдсӧ обласьтын паськалӧм вылӧ. 1924 воын Обсоюз бара ньӧбис 25 порсьпи английскӧй йоркшир порсь рӧд да став обласьт пасьта разӧдіс ЕПО-яс пыр. Тайӧ воясас Коми обласьт пасьта ёна паськаліс порсь видзӧм. Обсоюз уна отсаліс тайӧ уджас.
1924ʼ воын жӧ Обсоюз паськӧдіс ЕПО-яс пыр 25 сельскокӧзяйственнӧй библиотечка. Ӧні Обсоюз ещӧ на ёнджыка кутчысис нигаяс разӧдан уджас.
1925 воын Обсоюз ЕПО-яс пыр 10 вӧлӧсьтӧ разӧдіс 10 племеннӧй ӧшпиянӧс емваса сюртӧм мӧс рӧдысь. Обсоюз кындзи ӧшъяссӧ ещӧ некод на эз разӧдлы крестьяна пӧвстын. Коми обласьтын крестьяналысь овмӧс лэптыны медъёна позьӧ сӧмын скӧт бурмӧдӧмӧн. Тайӧ уджсӧ ёна на колӧ водзӧ нуӧдны.
Медсьӧкыд уджыс Обсоюзлӧн вӧлі Обисполкомкӧд вӧчӧм договор серти кӧйдыс крестьяналы судзӧдӧм. Обсоюз ёна зілис корсьны бур кӧйдыс. Ӧткымын инъясын Обсоюзӧн вайӧм кӧйдысыс вайис уна бур. Дерт, вӧліны и омӧльторъяс. Колян вояс вӧліны омӧльӧсь, бур кӧйдыс вӧлі сьӧкыда сюрӧ ньӧбны. Сэсся крестьянаыс вӧлі кӧйдыстӧ дон босьттӧг надейтчӧны сеталіг да вывті уна вӧлі корӧны. Сы понда Обсоюзлы лоӧ вӧлі корсьны кӧйдыстӧ быд пельӧсысь. Сэсся роч кӧйдысыд миянын омӧльджыка жӧ чужӧ. Кӧнсюрӧ вӧлі норасьӧны вайӧм кӧйдыс чужтӧм вылӧ да омӧля нянь воӧм вылӧ. Дерт, Обсоюзӧн судзӧдӧм кӧйдыс вайис крестьяналы уна бур.
Тадзи отсаліс Обсоюз крестьяналысь овмӧс лэптыны. Водзӧ кежлӧ Обсоюз тайӧ уджсӧ ёна чинтӧ, а мукӧдторсӧ дзикӧдз эновтӧ.
Ӧні Сыктывдінкарын лои выль кооперативнӧй союз — Селькустпромкредитсоюз. Ӧні став тайӧ уджсӧ кутас нуны сійӧ.
А. Потапова.
