КЫДЗИ ЮГОСЛАВИЯЫН КРЕСТЬЯНА КОСЯСЬӦНЫ МУ ВӦСНА

Югославияын 12 миллион морт. Войнаӧдз тайӧ государствоыс эз на вӧв, артмис сӧмын война бӧрын. Югославияса государствоас муыс пырис квайт государствоысь: Сербияысь, Австрияысь, Венгрияысь, Турцияысь, Черногорияысь да Болгарияысь. Сербъясыс Югославияын коймӧд юкӧнсьыс унджыкӧнӧсь (39%).

Югославияын унджык йӧзыс крестьяна, му уджалысьяс. Власьтсӧ кутӧны важ сербияса капиталистъяс, помещикъяс да военнӧй йӧз. Югославияын пырысь мукӧд пӧлӧс сёрниа йӧзсӧ (хорватъясӧс, словенъясӧс да мукӧдӧс) ӧні сэні вывті ёна дзескӧдӧны.

Крестьянаыслы Югославияын зэв сьӧкыд овны. Унджык муясыс помещикъяс да государство киас. Крестьяна ордас муыс зэв этша. 209 помещиклӧн Кроатия провинцияын (миян губерня кодь) муыс куим мында 180 сюрс сэтчӧс крестьяна кӧзяйство муяс дорысь. Войнаӧдз дай война дырйиыс пыр крестьяна уналаын на вӧліны помещикъяс улын. Крестьянаыслы вӧлі лоӧ пыр мынтыны помещикъяслы зэв ыджыд оброкъяс.

Война бӧрын крестьяна ёна кутісны кыпӧдчыны правительство вылас, корны налысь му. Правительствоыслы война бӧрын лои лэдзны торъя видз-му йылысь закон. Сійӧ закон сертиыс, колӧ вӧлі уна помещикъяслысь муяссӧ сетавны крестьяналы. Сӧмын эз ло дзик закон сертиыс: ичӧтика помещикъяслысь муяссӧ сеталісны сӧмын кулакъяслы, важ салдатъяслы да найӧ семьяясыслы. Гӧль крестьяна важ мозыс бӧр колины муястӧг.

Гӧль крестьяналы помещикъяслысь муяс сеталӧм пыдди правительствоыс найӧс тюрмаясӧ шыблалӧ да джагӧдалӧ.

Крестьянаӧс Югославияын пӧдтӧны налогъясӧн. Сэні кокньыд овны сӧмын помещикъяслы да кулакъяслы.

Крестьяна пыр дӧзмӧны правительство вылас, кыпӧдчӧны уналаын, корӧны аслыныс кокньӧд да му. Правительствоыс эськӧ ёна нин уна крестьянаӧс лыйліс да шыблаліс тюрмаясӧ, сӧмын крестьянаӧн кыпӧдчӧм пыр ӧтарӧ паськалӧ.