ПЫРӦЙ МОПР-ӧ

Март кӧкъямысӧд лунӧ тыри куим во МОПР лӧсьӧдӧмсянь (МОПР — ставмувывса ӧтувтчӧм революция дор вензьысь йӧзлы отсасьӧм кузя). МОПР-сӧ лӧсьӧдлісны сэки важ большевикъяс общество туйдӧдӧм серти.

Сійӧ чукӧстчис ставмувывса уджалысь йӧз дінӧдз отсавны капиталист тюрмаясӧ революция удж нуӧдӧмысь пуксьӧдӧм йӧзлы. Уджалысь йӧз шыасисны тайӧ чукӧстчӧм вылӧ, кутісны пырны МОПР-ӧ. Найӧ мӧда-мӧдсӧ отсалӧмӧн кӧсйӧны регыдджык воны ставмувывса революцияӧдз.

Тайӧ куим вонас МОПР ячейкаяс паськаліны быд пельӧсын став му вылас, сэні шленас 5 миллион морт нин.

Куим вонас МОПР сетіс ён отсӧг уна сюрс революция вӧсна капиталист тюрмаясын пукалысьяслы да найӧ семьяяслы. Сійӧ мездіс кулӧмысь уна сё революция дор сулалысь йӧзӧс.

Ӧні МОПР-лӧн уджыс ещӧ на содӧ. Капиталистъяс пыр ӧтарӧ ёнджыка заводитӧны дзескӧдны революция дор сулалысь йӧзӧс, виалӧны найӧс, шыблалӧны тюрмаясӧ.

Сы вӧсна быд гӧгӧрвоысь уджалысьлы колӧ отсавны, ёнмӧдны МОПР-сӧ; быд МОПР ячейкалы колӧ паськӧдны ёнджыка ассьыс уджсӧ.

Ӧнӧдз оз на став МОПР ячейкаясыс бура уджавны, уна шлен на бумага вылын сӧмын вӧлі. Сы вӧсна ӧні МОПР-са шленъяссӧ мӧд пӧв гижӧдӧны (переучет), сеталӧны выль ставсоюзса шленскӧй билетъяс. Выль пӧв шленъяссӧ гижалӧмыс ёнмӧдас МОПР ячейкаяссӧ. Ӧні сэтчӧ пырасны сӧмын коді кӧсйӧ уджавны, отсавны мукӧд государствоясса вокъяслы революция вӧсна косясигас.

Миян Коми обласьтын ӧні 106 МОПР ячейка; сэтчӧ пырӧмаӧсь 2.402 морт. Октябр 1924 восянь январ 1926 воӧдз миян чукӧртӧма МОПР-ӧ 4.560 шайт. Сӧмын ёна на колӧ ёнмӧдны миян тайӧ уджсӧ. Быд коми крестьянинлы колӧ тӧдны МОПР йылысь, отсавны сылы уджсӧ нуӧдны.

Пырӧй, коми уджалысь йӧз, МОПР-ӧ, ёнмӧдӧй сійӧс, отсалӧй революция вӧсна косясьысь ёртъяслы.