ОТСАЛАМӦЙ МОПР-лы!

Обласьтувса Раб. Кр. Инспекциябердса МОПР ячейка март 17-ӧд лунӧ чукӧртліс ӧтувъя собранньӧ. Сэтчӧ волісны МОПР-са шленъяс коммунистъяс, комсомолечьяс да профсоюзса шленъяс — ставыс 13 морт. Сійӧ собранньӧ вылын шуисны: чорыдджыка вынсьӧдны МОПР ячейкаӧс; унджык чукӧртны шленъясӧс — служащӧйяс да крестьяна пӧвстысь, ӧтувтчӧмӧн ёнджыка отсавны капиталист государствоса тюрмаясын революция вӧсна пукалысь войтырлы.

МОПР ячейкаса бюролы тшӧктісны тайӧ шуӧмъяс сертиыс уджавны. Бюроыслы жӧ тшӧктісны чукӧртны ӧктысян листӧн сьӧм Львов карса (Польшаын) подшефнӧй тюрмаын пукалысь политзаключённӧйяслы ыстӧм вылӧ да МОПР литература судзӧдӧм вылӧ. Сэсся собранньӧ шуис корны Р. К. Инспекцияса служащӧйясӧс судзӧдавны ас ним выланыс МОПР литература да кыскыны МОПР-ӧ мукӧд учрежденньӧса да организацияса служащӧйясӧс.

Собранньӧ вылас жӧ чукӧртісны сьӧм МОПР-ӧ. Ставыс чукӧрмис комын кӧкъямыс шайт. МОПР литература судзӧдӧм вылӧ гижсис кӧкъямыс морт. Сы кындзи бюроыс кӧсйӧ судзӧдны быдпӧлӧс МОПР литература. Сы пиысь мыйкӧ мында кӧсйӧ мӧдӧдны подшефнӧй деревняса краснӧй уголокӧ.

Коми Мишӧ.