СОЮЗСА ЦИК-лӧн СЕССИЯ

Апрель 10 лунӧ Мӧскуаын чукӧртчас Союзса Центральнӧй Исполнительнӧй Комитетлӧн мӧд сессия.

Медвойдӧр сессия видлалас да вынсьӧдас Союз республикалысь 1925−26 во кежлӧ бюджет. Бюджет — республикалӧн прихода-рӧскода нига, тайӧ нига серти быдӧн аддзасны, уна-ӧ Сӧвет власьт чукӧртӧ налогъяс, кытчӧ чукӧрмӧм сьӧмсӧ видзӧ.

Союз республикаӧ пырӧны 6 торъя республика. Быд сессия вылын овлӧ доклад торъя республика правительстволӧн. Тайӧ сессия вылын украинаса правительство вӧчас доклад Украина йылысь.

Сэсся быд республикаясын (кодъяс ӧтувтчӧмаӧсь Союзӧ) эм асланыс уголовнӧй законъяс. Сессия лӧсьӧдас уголовнӧй закон ӧткодьӧс став республикаяслы, сӧмын торъя республикаяс вермасны вежлавлыны торъя статьяяс асланыс олӧм серти.

Сессия видлалас да вынсьӧдас выль закон сельхозналог йылысь. Ӧнӧдз сельхозналог босьтлісны пашня да скӧт серти; выль сельхозналог закон серти налог босьтны кутасны доход серти.

Сэсся сессия лӧсьӧдас выль положенньӧ местнӧй бюджетъяс йылысь да вынсьӧдас Центральнӧй Исполнительнӧй Комитетса Президиумлысь сессияяс костын шуӧмъяс.