КОЛӦ ЛӦСЬӦДНЫ СЕЛЬСКОКӦЗЯЙСТВЕННӦЙ СӦВЕТЪЯС

Быд агрономлы колӧ кутчысьны тайӧ уджас!

Колян восянь на сӧмын Сӧвет республикаяс пасьта заводитісны лӧсьӧдавны сельскокӧзяйственнӧй Сӧветъяс. Тайӧ дженьыдик каднас Союз пасьта лӧсьӧдӧмаӧсь 1.700 сельскокӧзяйственнӧй Сӧвет нин.

Сӧветъяслӧн медыджыд уджыс — йитны крестьянаӧс агрономъяскӧд да мукӧд пӧлӧс крестьяна кӧзяйство тӧдысь велӧдчӧм йӧзкӧд, кыскыны став крестьянасӧ асьнысӧ сёрнитны, кыдзи-мый бурджык да лӧсьыдджык овмӧссӧ кыпӧдныс, мыйясджык налы сы вылӧ колӧ.

Сӧветъяс кыскӧны водзӧ, выль ноглань мунысь крестьянасӧ да мукӧд вӧлӧсьтса велӧдчӧмджык йӧзсӧ уджавны крестьяна пӧвстын, отсавны да велӧдны найӧс овмӧссӧ кыпӧдны.

Сэсся Сӧветъяс ассьыныс шленъяссӧ тшӧктӧны отсавны агрономъяслы, кор найӧ нуӧдӧны кутшӧмсюрӧ уджъяс вӧлӧсьтъясын.

Кодъяс нӧ пырӧны сельскокӧзяйственнӧй Сӧветъясас? Ӧти-кӧ, сэтчӧ пырӧ волисполкомса шлен, сэсся быд сельсӧветысь ӧти представительӧн, ӧти представительӧн жӧ вӧлӧсьтувса коммунист партия ячейкаысь, комсомол ячейкаысь, женотделысь, мӧда-мӧдлы отсасян комитетысь, Всеработземлесысь, Волполитпросветкомысь, кооперативъясысь, сельскокӧзяйственнӧй кружокъясысь. Сэсся Сӧветас тшӧтш пырӧны выль ногӧн бура муяссӧ уджалысь крестьяна, агрономъяс, землемеръяс, скӧт лечитысь врачьяс. Тані агрономъяскӧд, землемеръяскӧд да мукӧд сэтшӧм тӧдысь йӧзкӧд ӧтвылысь крестьяна сёрнитӧны да лӧсьӧдӧны, кыдзи позьӧ бурджыка уджавны видз-му, кыдзи лэптыны овмӧс, мыйясджык колӧны сы вылӧ.

Миян Коми обласьтын колӧ кутчысьны агрономъяслы да мукӧд вӧлӧсьтувса организацияяслы лӧсьӧдавны сӧветъяс, кыскыны крестьянаӧс выль олӧм сиктъясын лӧсьӧдны.

М. Ш.