РАЗӦДӦЙ МӦД КРЕСТЬЯНСКӦЙ ЗАЁМ!

2-ӧд крестьянскӧй заём ыджыд пӧльза вайӧ крестьяналы

2-ӧд крестьянскӧй заёмлӧн облигацияяс ёна разалісны каръясын, рабочӧйяс да служащӧйяс костын. Финанс комиссариатлы лои облигацияяссӧ лэдзны содтӧд. Коми обласьтувса финанс юкӧд мӧдӧдӧма ӧні облигацияяссӧ уездъясӧ крестьяна костын разӧдны. Сиктса уджалысьяслы колӧ быдӧнлы висьтавлыны крестьяналы, кутшӧм пӧльза вайӧ крестьяналы да государстволы 2-ӧд крестьянскӧй заём.

Пӧльзаыс облигацияысь зэв ыджыд. Медвойдӧр тайӧ заёмыс сетӧ ыджыд прӧчент — облигацияыс вайӧ вонас 12 прӧчент (12 урӧн быд шайт вылӧ). Сэсся тайӧ заёмыслӧн латаръяыс во чӧжӧн лоӧ нёльысь, воӧмъясыс (выигрышъясыс) 25 шайтсянь 5000 шайтӧдз. Ӧти латаръя вӧлі нин декабр тӧлысьын Мӧскуаын, апрель первойя лунсянь лоӧ мӧд латаръя Ростов-Дон-вылын.

Сідзкӧ 2-ӧд крестьянскӧй заёмыс уна бур вайӧ. Коми крестьяналы колӧ ёна босьтавны облигацияяссӧ.

2-ӧд крестьянскӧй заём вайӧ ыджыд пӧльза крестьяналы, но ещӧ ыджыдджык пӧльза ваяс сійӧ государствоыслы. Сӧвет республикаяслы колӧ уна сьӧм ӧдйӧджык кыпӧдны овмӧссӧ. Капиталист государствояс пыр на ыждалӧны Сӧвет Союз вылын, налысь дыр лоӧ виччысьны уджӧн сьӧм сетӧмтӧ. Сӧвет правительстволы лоӧ корсьны отсӧг кыськӧ мӧдлаысь. Коді сылы вермас отсавны? — Сӧмын Сӧвет республикаясын олысьяс — рабочӧйяс да крестьяна. Рабочӧйяс отсалісны нин, уна облигация найӧ костын, республика виччысьӧ ӧні отсӧг крестьянасянь.

Коми крестьяна, отсалӧй Сӧвет республикалы выль олӧм лӧсьӧдны, кыпӧдны овмӧс; гижсялӧй заём вылӧ, сетӧй ассьыныд заптӧм сьӧм облигацияяс вылӧ!

Облигацияяс вузасьӧны волисполкомъясын, кооперативъясын.

Н. К.