ВЫЛЬ МОЛИТВАВетлывлі ме уна, Туйтӧ ёна гынді... Ӧтчыд сідз жӧ муна Собор-вичко дінті. Видзӧда, сэн тьӧтӧ Вичко вылӧ дзоргӧ — Пернапасъяс лӧдӧ, Выль молитва боргӧ: «Святӧйяс кӧ эмӧсь, Кывзӧй ёна, бура... Меным сетны милӧсьт Абу мый нин пӧра?.. Семен преподобнӧй! Спас да пречистая!... Нылӧс кӧсйи сетны Озыр жӧник сайӧ... Сійӧ вӧлӧм тӧдса Вӧрса большевиккӧд... Кӧдзӧдіс нин рӧдсӧ — Ог лысьт петны сиктӧ... Ыджыд блавещенньӧ! Сарича Епросся!.. Аслам чужтӧм нывлы Сідзи ӧмӧй позьӧ?... Йӧймӧма тшӧтш пиӧй, Вичкоӧ оз ветлы... Дерт, буракӧ, сійӧ Кевмӧ сюра сӧтлы... Блаженнӧй Ирина! Тӧвся Карлампея!... Татшӧм челядь дінад, Дерт ӧд, грекад вӧян... Кыдз нӧ кутам овны, Быдлаын кор пакӧсьт?.. Со ӧд лоӧ повны Аслад попысь-дякысь... Кывзы, благовернӧй Князь Ӧльӧксан Невскӧй! Шыбитӧма-н перна Поп Еремеевскӧй... Лекар Пантелеймон! Устюгса Прокопей!... Мед кӧть нин эз йӧймы Миян Клавди попӧй... Паськыд масленича, Матушкаӧй, кывзы: Тшӧтш тэныд ме видза Дзуглясяна кывсӧ... Сарича небесна, Всек скорбящик радосьт! Тӧждысь миян вӧсна — Ми сы вылӧ радӧсь... Сергей Радонежскӧй! Мати всепетая!... Ӧнъя олӧм вежӧй — Важ олӧмсӧ вайӧ!... Изӧсим-Саватей! Дзор тоша Микола!... Мед вӧлі сар-батьӧй, Ленинысь ме пола... Милӧсьта Сретенньӧ Да Микола Ретскӧй!.. Сулалам затрення — Мед эз вӧв и Троцкӧй!.. Степан тэ великӧй, Асланым Перимскӧй! Сарыс кӧ оз кывсьы — Мед кӧть нин Керенскӧй!... Онтоней Печерскӧй! Вӧскресиння Кристов!.. Мед вӧліны: земскӧй, Исправник да пристав!.. Серапим Саровскӧй! Микола угодник!... Мед, кӧть и вӧровскӧй, Да вӧлі урадник!... Микайлӧ Аркандел! Габрилӧ Аркандел!... Мед вӧліны танӧсь Деникин да Врангель!... Ленин кулӧм бӧрын, Позяна кӧ таво, Вӧліны мед бӧрлань Латкин да управа!... Малання да Марин... Быдсяма святӧйяс!... Вӧліны мед карын Важ кодь тӧргӧвӧйяс!... Ёгорей праведнӧй Да ыджыд Веденньӧ!... Большевикысь мездӧй — Служитам ӧбедня!.. Димитрий Селунскӧй Да патриарк Медос!... Синманыс сьӧлыштӧй — Мед оз корны мӧдӧс!... Пророк Илля, гымышт — Большевик мед садьмас; Мед весасяс «кырныш» Ен тӧдтӧм юр садьнас!... Улита, Кирита! Петыр-Павел «ключник»!... Райӧ эн примитӧй Большевиклысь кучик!»...
