АР

Бара нин кольӧма гажа гӧрд гожӧм,
Вой тӧлӧн, зэр, няйтӧн локтӧма ар.
Шондіыс мудзӧма, дзеблалӧ чужӧм,
Кымӧрӧн вевттьысьӧ, абу нин жар.
Гырысь-кыз кымӧръяс локтӧны помтӧм,
Киссьӧ век дугдывтӧг посньыдик зэр,
Пемдӧма югыд ю, лоӧма тӧдтӧм.
Гажтӧма видзӧдӧ шытӧм куш вӧр.
Скӧрмӧма вой тӧлыд, лёкпырысь дзижгӧ:
Пуясысь скӧрпырысь нетшкалӧ кор,
Гожӧмлысь долыда олӧмсӧ чышкӧ,
Оз кольӧд тӧв кежлӧ нинӧм буртор.
Оз кывсьы вӧр пытшкын пӧткалӧн сьылӧм,
Оз чеччав увъясӧд ичӧтик ур,
Кытӧнкӧ выліын кылыштӧ горзӧм,
Турияс мунӧны, кольӧмны нюр.
Кытчӧ он видзӧдлы, быдлаын тыртӧм,
Кушмӧма му вылыс, кушмӧма йӧр,
Сӧмын дзик вой тӧлыд вайӧдӧ помтӧм
Кытыськӧ войвывсянь посньыдик зэр.
Гожӧмӧй, гожӧмӧй, кытчӧ тэ мунін?
Водз на ӧд, бергӧдчыв... нюмдышт на вай!
Кытчӧ тэ шоныдтӧ, дзоридзтӧ нуин,
Кытчӧ-мый мунісны пӧтка да кай?!...
Сьӧлӧмӧй эз на пӧт, корӧ на югыд,
Кынмӧ на шондітӧг, корӧ бур лун.
Кокньӧдышт, коньӧрлы ёна на сьӧкыд,
Бергӧдчыв... сувтыштлы... он на жӧ мун?!...