АСЫВСЯНЬ ВОЙ ШӦРӦДЗ...

Асывсянь вой шӧрӧдз
Ветлӧдлан-шӧйтан — 
Шуам нин, служитан — 
Тэрмасян-локтан.
Юны ни сёйыштны;
Некытчӧ водны:
Пӧлатьтӧм-паччӧртӧм,
Крӧвать ни вольпась;
Чеччӧм мысьт гегдӧмла
Некыт оз куснясь;
Пуысь ни пӧжалысь,
Чышкысь ни мыськысь.
Йӧз ордӧ мунан да:
«Овны вай лэдзӧй!»
Быдторсӧ висьталан.
Шуасны воча:
«Асьным нин унаӧн,
Сідз нин со дзескыд.
Деньгаыд вылӧ ӧд
Нинӧм нин оз шед...
Вурун ли дӧра ли
Ваян кӧ, лэдзам,
Кутад кӧ ломтыны
Асланыд пескӧн!»
Жугыля ӧдзӧсӧд
Ньӧжйӧник петан.
Гож вылӧ, лым вылӧ
Видзӧдлан гӧгӧр.
Кӧдзыд ру тӧв йылысь
Лолыштан пыдӧдз,
Лёк позъяд во мысти
Шогӧдас бара.