ПОЗЬӦ БОСЬТНЫ БОКӦВӦЙӦС ПИ ПЫДДИ

Центральнӧй Исполнительнӧй Комитет неважӧн вынсьӧдіс закон пи пыдди босьтӧм йылысь.

Выль закон серти, позьӧ ӧні босьтны пи пыдди бокӧвӧй челядьӧс, сӧмын мед эз вӧвны найӧ 18 арӧсысь ыджыдӧсь да мед налӧн олӧмыс эз пыртӧм бӧрас омӧльтчы. Пи пыдди пыртігӧн позьӧ челядьлысь овсӧ вежны.

Челядьлӧн кӧ эм бать-мам, босьтігас и лоӧ тшӧтш налысь юавны, сідзжӧ челядьлы кӧ 10 арӧсысь унджык, налысь лоӧ жӧ юавны, пырасны оз найӧ пи пыдди.

Пырӧм пилы сетчӧ став права, сійӧ лыддьыссьӧ пиӧн, сійӧ наследство вермӧ босьтны, лоӧ сідзжӧ тӧждысьны пыртысь морт вӧсна: оз кӧ вермы сійӧ уджавны — лоӧ сійӧс вердны.

Пыртны челядьӧс олӧм вылӧ, босьтны пи пыдди оз позь сӧмын сэтшӧм йӧзлы, закон серти кӧ найӧс оз позь пуктыны опекунъясӧ.

Кодкӧ кӧ кӧсйӧ босьтны бокӧвӧй челядьӧс пи пыдди, ковмас опекунсянь либӧ волисполкомсянь судзӧдны гижӧд, мый челядьлы выль бать-мам дінын овны лоӧ бурджык. Закон тшӧктӧ быд мортлы гижны народнӧй судӧ заявленньӧ, аддзас кӧ сійӧ, мый пыртӧм челядьлӧн олӧмыс зэв сьӧкыд выль оланінас.

Сиктъясын пырӧм йӧзлы (вердысь пилы) сетсьӧ сэтшӧм жӧ права, кутшӧм права сетсьӧ пи пыдди босьтӧм челядьлы (вермӧны босьтны наследство, лоӧ вердны старикъясӧс).