БУРДЖЫКА ВӦЧАЛӦЙ СКӦТ ОЛАНІН
Регыд тулыс. Матысмӧ стрӧитчан кад. Сиктъясын бара заводитасны гымӧдны выль керка-картаяс. Вӧр миян уна дай донтӧм. Оз позь шуны, мый миян крестьяна ньӧти оз кужны стрӧитны аслыныс оланінсӧ. Унджыкыс стрӧитӧ аслыс оланінсӧ бурӧс. Пыран да — югыд, сӧстӧм, абу торъя дзескыд. Важӧн, войнаӧдз, коми йӧз эз сувтлыны стрӧитчигӧн ӧшинь рамаысь. Бокисянь видзӧдлан да, сярвидзӧ ӧшиньыс: коланінас и ковтӧминас. Сійӧ эськӧ ставыс бур, да сӧмын миян оз на зэв кужны скӧтлы оланін вӧчны. Асьным олам югыдінын да сӧстӧминын, а скӧтлы вӧчам гу кодь пемыдӧс, гӧгӧр розьӧсь — тӧв ветлӧ пырыс. Аслыным кӧ долыд овны гажа югыд керкаын — скӧт йылысь огӧ и думыштӧй. Скӧтлы сэтшӧм долыд оланіныс ёнджыка колӧ, сійӧ ӧд петавтӧг тӧвбыд сэні олӧ. Мукӧд шуӧны: «Мый нӧ югыдсьыс? Аддзан кӧ карта вывсьыд мӧстӧ лысьтігас — и шань!» Абу на тыдалӧ, шань. Югыдінад мӧскыд горничаын моз олӧ. Сійӧ сэки весел, дзоньвидзаджык, унджык лысьтӧ йӧв. Вердчыны, лысьтыны, дӧзьӧритны куканясигъясын сідзжӧ бурджык. Миян бабаяс шулӧны: югыдінын олігӧн пӧ скӧттӧ ёнджыка ӧбӧдитӧны гожӧмын ном-гут, дай мӧсъясыс люкалӧны мӧда-мӧдсӧ. Гожӧмнад ӧд скӧтыд картаад сӧмын узьны волӧ. Зэв нин кӧ ёна кутасны ӧбӧдитны ном-гут, сэк позьӧ и тупкыштлыны рузумторйӧн ӧшиньяссӧ. Сэсся сӧстӧмджыка кӧ кутан видзны карта вывтӧ, косджыка, гутыс омӧльджыка кутас локны. Гутыс карта вылӧ миян локтӧ ёнджыкасӧ, закодъясыд миян карта вылынӧсь да. Сылы сэні дзик нин абу места. Колӧ быдӧнлы кутчысьны сійӧс бырӧдны карта вылысь. Сэсся люкасьӧмъяс йылысь. Люкасьӧны сӧмын наян, горш мӧсъяс. Сэтшӧмыс чукӧрас ӧти сюрлӧ. Сэтшӧм мӧсъяслы колӧ лӧсьӧдны торъя вежӧс, а ставныс кӧ ӧтиӧс ӧбӧдитӧны — сылы колӧ вӧчны вежӧс. (Кӧн бура видзӧны скӧтӧс — роч местаын, — сэн быд скӧтинаӧс сёйигкежлас кӧртавлӧны).
Югыдыд колӧ, мӧсъяс кындзи, вӧвъяслы, порсьяслы дай ыжъяслы. Порсьяслы югыдсӧ сетӧны этшаджык мукӧд скӧтиналы дорысь. Ӧшиньяс колӧ вӧчны кузьмӧса ног дай кыдз позьӧ вылӧджык. Вылӧ вӧчӧны, мед, ӧти-кӧ, оз судзны жугӧдны, а мӧд-кӧ, мед югыдыс скӧтлы оз синмас веськыда швачкы. Ӧшинь колӧ вӧчны дзирйӧн, медым вӧлі шогмӧ, кор колӧ восьтывлыны: гожӧмъясын, тулысын, кор сынӧдыс карта вылын омӧль, жар. Ыдждасӧ ӧшиньыслысь вӧвъяслы колӧ вӧчны дасӧд юкӧд гидня площадьыслысь, мӧсъяслы — дас витӧд юкӧнсӧ карта площадьыслысь, быд мӧс вылӧ ӧти ӧшинь 5 весьт кузьта да 3 весьт судта, порсьяслы ичӧтджыка.
Агроном
