КОЛӦ КЫПӦДНЫ УДЖ ДЕЛЕГАТКАЯС ПӦВСТЫН
Ставмувывса нывбаба праздник лунӧ Сӧвет власьт шуис: «Чорыдджыка кутчысьны тайӧ воас югдӧдны вежӧрсӧ уджалысь нывбабалысь, шыбитны сылысь пемыдлунсӧ да кыскыны сійӧс общественнӧй уджӧ».
Тайӧ воас чорыдджыка ковмас видзӧдлыны тайӧ удж вылас и миян Коми муын. Коми крестьянка ещӧ на пемыд паськыдінын олысь нывбабаяс дорысь, коми крестьянкаяс пиысь этшаджык на сюрӧ общественнӧй уджсӧ нуӧдысьыс. Тайӧ уджас ковмас миян кутчысьны пырысьтӧм-пыр жӧ. Ӧнӧдз унджыкыс на вӧлі шуӧны, нывбаба костын пӧ удж вермасны нуӧдны сӧмын нывбабаяс. Сы вӧсна, ковмасны кӧ вӧлі йӧз нывбабаяслы собранньӧ вӧчны ли мый ли, пыр вӧлі нывбабаӧс жӧ индӧны. Коммунист партия шуӧ: нывбабаяс пӧвстын пӧ удж нуӧдны колӧ ставыслы чорыда кутчысьны. Нывбабаяс пӧвстын удж нуӧдны колӧ босьтчыны учрежденньӧяслы да став вежӧра, водзын мунысь, Сӧвет власьт дор сулалысь йӧзлы. Сӧмын ӧтув уджӧн ми вермам кыпӧдны бабаяс пӧвстын удж.
Миян Коми обласьтын эм таво сюрс ӧкмыссё кӧкъямысдас кык делегатка; на вылӧ ёнджыка ковмас видзӧдлыны тайӧ воас, мед эськӧ бӧрйӧм срок тыригкежлас велаліны общественнӧй удж нуӧдны, мед на чукӧрын эз коль весиг ӧти велӧдчытӧм морт. Миян делегаткаяс чукӧрысь унаӧс сюйӧны учрежденньӧясӧ велӧдчыны уджавны. Учрежденньӧса уджнас тӧдмасьӧмӧн найӧ велалӧны ньӧжйӧникӧн уджсӧ нуӧдны да кутчысьӧны бӧрнас зіля общественнӧй уджӧ. Мукӧд губерняясын тадзи велӧдчӧмӧн уна нин общественнӧй удж нуӧдысь нывбаба петіс. Миян Коми обласьтын тайӧ уджыс ёна на чотӧ, ӧнӧдз на учрежденньӧясыс эз гӧгӧрвоны, кутшӧм ыджыд пӧльза сетӧ Сӧвет власьтлы нывбабаяслӧн уджас велӧдчӧмыс.
Делегаткаяслысь унаысь кывлан шуасьӧм: оз пӧ корлыны миянӧс учрежденньӧясас (кытчӧ найӧс индӧмаӧсь велӧдчыныс) собранньӧяс вылас либӧ мукӧдлаӧ. Ми пӧ эськӧ сэні уна буртор вермим тӧдмавны. Унаысь на учрежденньӧясад уджалысьясыдлысь кывлан: мыйла нӧ пӧ найӧс корам, некутшӧм отсӧг пӧ найӧ оз вермыны сетны да. Сідзи видзӧдны оз позь. Дерт, крестьянка пырысь-пыр оз вермы сетны пӧльза, но во чӧжсӧ кӧ уджалас да ми кӧ сійӧс велӧдам, миян уджыс прӧста оз вош. Каръясын унаысь овлывлӧ сідзи: делегатка служитӧ кутшӧмкӧ учрежденньӧын, а сійӧс уджавны велӧдчыны индӧмаӧсь мӧд учрежденньӧӧ. Мукӧддырйиыс делегаткатӧ корасны заседанньӧ вылӧ сэтчӧ, да заведуйтысьыс оз лэдз: мыйла пӧ мунан сэтчӧ, тэ пӧ ӧд миянын служитан, миянысь пӧ жалӧванньӧсӧ босьтан. Та ног уджалӧмысь кад нин дугдыны. Учрежденньӧяс делегаткаӧс-служащӧйӧс кутны оз вермыны уджавны велӧдчыны ветлӧмысь. Сы йылысь эм торъя приказ. Сійӧ приказ сертиыс, делегаткаяс-служащӧйяс вермӧны ветлыны заняттьӧяс дырйи велӧдчыны уджавны (собранньӧяс вылӧ да мый да) тӧлысьнас 10 час.
Сыктывдінкарын колӧ ёнджыка видзӧдлыны секцияса удж вылӧ. Делегаткаяс норасьӧны: мукӧд секцияыс пӧ эз на ньӧтчыд корлыны миянӧс. Секцияын удж нуӧдысьяслы колӧ видзӧдлыны тайӧ шуасьӧм вылас да юӧртлывны делегаткаяссӧ.
Виттор Наталь.
