КОМИ ГИЖЫСЬЯС, ӦТУВТЧӦЙ!
Важӧн коми йӧзлӧн некутшӧм литература эз вӧв, некутшӧм коми гижысьяс эз вӧвны (ӧткымын велӧдчӧм комияс гижлывлісны коми йӧз йылысь, сӧмын рочӧн). Сӧвет власьт пуксьӧм бӧрын быд посни йӧзлы позьны кутіс велӧдчыны ас кывйӧн школаясын, позьны кутіс гижны ас кыв вылын нигаяс, газетъяс, пьесаяс, висьтъяс, сьыланкывъяс, стихотворенньӧяс да мукӧдтор. Коми газет, коми нигаяс коми йӧзлы зэв колантор: сэтӧн гӧгӧрвоана ас кывйӧн гижӧма, кыдзи мукӧдлаын олӧны, мый керсьӧ СССР пасьта, став му пасьта; сэн гижӧны, кыдзи выль бур олӧм лӧсьӧдны, водзӧ мунны; лӧсьыда да буртор йылысь гижӧм нигаяс позьӧ лыддьыны шойччигмоз праздникъясын; нигаяс серти вӧчалӧны спектакъяс, а спектакъястӧ ӧд быдӧн радейтӧны видзӧдныд-кывзыныд; лӧсьыда гижӧм сьылан-лыддянъяс лӧсьыд да долыд лыддьыны да сьывны, кывзысьлы кывзыны.
Медбӧръя вит-квайт вонас югдісны коми йӧз пӧвстысь уна гижысьяс, уна найӧ гижисны. Сӧмын миян печатайтӧм литература зэв на этша. Колан, бур литература миян абу на уна, литература лӧсьӧдан удж миян оз ёна сӧвмы, ёнмы. Ӧти-кӧ, ми гӧльӧсь на ӧні, огӧ на вермӧ уна коми нига лэдзны (печатайтны). Ӧні воысь воӧ ми озырмам, олӧм бурмӧ, вермыны пондам унджык нига печатайтны.
Мӧд-кӧ, коми гижысьяс ставыс на разі-пели гижӧны, оз тӧдны мӧда-мӧдсӧ, оз тӧдны, мый коді гижӧ, мый кыдзи гижӧ. Ми огӧ на тӧдӧ, уна-ӧ миян коми гижысьясыс. Кодкӧ кӧ мыйкӧ гижас — некодлы петкӧдлыныс, сёрнитныс гижӧд йывсьыс, ошкыныс ли кулитныс, мӧда-мӧдлы отсыштныс. Разалӧмаӧсь коми гижысьяс паськыд Коми му пасьта, мыйкӧ вӧчӧны, кыдзкӧ вӧчӧны, мӧда-мӧдӧс оз тӧдны.
Тадзтӧ коми литература вӧчӧм бура оз мун, тадзтӧ бур, колан литература оз артмы. Колӧ коми гижысьяслы ӧтувтчыны, мӧда-мӧдкӧд кӧртасьны, котыртчыны.
Мый бурыс тайӧ котыртчӧмысь?
1. Ӧтувтас, ловзьӧдас ӧнія коми гижысьясӧс, налысь уджсӧ йӧткас водзӧ;
2. пондас отсавны петны-чужны выль коми гижысьяслы коми йӧз пиысь (велӧдчыштӧм йӧз пиысь, селькоръяс пиысь);
3. ӧтвылысь мӧда-мӧдлысь гижӧдъяс видлалӧмӧн, гижасьӧмӧн, сёрнитӧмӧн отсавны мӧда-мӧдлы велӧдчыны бура да колантор йылысь гижны;
4. ӧтвылысь кокньыдджык вермасьны сэтшӧм йӧзкӧд, кодъяс оз на гӧгӧрвоны коми кывйыслысь да коми литературалысь коланлунсӧ да мунӧны паныд, дзугӧны;
5. вермам босьтчыны, лэдзны коми литература журнал;
6. став коми литература лӧсьӧдӧмсӧ ӧддзӧдам, бурмӧдам;
7. ӧтвылысь вермамджык дорйыны ассьыным уджнымӧс.
Сыктывдінкарса коми гижысьяс панісны тайӧ могсӧ: март 12 лунӧ чукӧртчылісны и шуисны коми гижысьяслы ӧтувтчыны ӧти котырӧ (
Коми гижысьяслы колӧ шыасьны, колӧ кӧртасьны, ӧтувтчыны тайӧ котырӧ.
Коми Парма пасьта разалӧм коми гижысьяс, шыӧдчӧй, пырӧй коми гижысьяс котырӧ!
А. Чард.
