ФЕВРАЛЬСА РЕВОЛЮЦИЯ

Ӧкмыс во сайын Россияын вӧлі мӧд (февральса) революция. Медводдза революция дырйи, 1905 воын, рабочӧйяс да крестьяна эз вермыны шыбитны сарӧс, но 1905ʼ вося революцияыс велӧдіс рабочӧйясӧс бурджыка ӧтувтчыны, индіс, кыдзи колӧ вермасьны саркӧд да капиталистъяскӧд. Дас кык во мысти, февральын 1917 воӧ, россияса рабочӧйяс крестьянакӧд ӧтвылысь вӧчисны мӧд революция — шыбитісны сарӧс.

1914 восянь Россия вӧлі воюйтӧ Германиякӧд. Война дыр кутіс нюжавны, сьӧкыд лои овны рабочӧйяслы да крестьяналы: эз ло нянь, бырны кутісны мукӧд тӧваръяс, киссис кӧмкот-паськӧм; заводъяс сӧмын вӧчалісны война вылӧ колантор. Сарлӧн генералъяс вузавлісны салдатъяссӧ, уна сюрсӧн вӧлі биӧ некутшӧм оружйӧтӧг сюйӧны.

Россияса армияын 3 да джын миллион морт усис война вылын да ранитчис. Уджалысь йӧз ёна скӧрмисны война пондаыс. Рабочӧйяс сэсся кыпӧдчисны прамӧя нин вермасьны лёк правительствокӧд.

1917 вося революция заводитчис Питерын февраль тӧлысьын (важ ног). Февраль 21 лунӧ Колпиноын (Питер дінын) уджалысь рабочӧйяс вӧчисны забастовка; найӧ вӧлі корӧны сӧмын содтыштны неуна дон да сетны налы нянь. Лун вит бӧрын рабочӧйяс корӧны нин вӧлі шыбитны лёк правительство да сарӧс тшӧтш. Накӧд сэсся сувтісны мукӧд пабрик-заводъясысь рабочӧйяс, забастовка паськаліс Питер пасьта. Быдлаын рабочӧйяс дугдісны уджавны, петісны ывла вылӧ гӧрд флагъясӧн, лозунгъясӧн: шыбитам сарӧс, помалам война!

Роботничаяс праздник бӧрын (март 8 лун бӧрын) революция ещӧ ёнджыка кыптіс. Ывла вылӧ петісны нывбабаяс да челядьяс, флагъяс вылын налӧн вӧлі гижӧма: «Вайӧй нянь, помалӧ регыдджык война!»

Правительство сувтӧдіс кок йылӧ став войскасӧ, став пӧличасӧ. Митингъяс рабочӧйяслысь кутісны разӧдны оружйӧясӧн, лыйлісны оружйӧтӧм йӧзӧс. Март 12 лунӧ рабочӧйяскӧд ӧтлаасисны салдатъяс — Волынскӧй, Павловскӧй, Литовскӧй да мукӧд полкъяс.

Революциялӧн вын содіс.

Войнас март 12 лунлы паныд вӧлі бӧрйӧма временнӧй Исполнительнӧй Комитет Государственнӧй Думаын, сэк жӧ вӧлі лӧсьӧдӧма рабочӧйяслы сӧвет.

Февраль 15 лунӧ сар Николай ӧткажитчис престолысь да сетіс престолсӧ вокыслы, сӧмын уджалысь йӧз эз лэдзны вокыслы пуксьыны сарӧ. Март 20 лунӧ Николайӧс арестуйтісны.

Февральса революция бӧрын власьтсӧ босьтісны помещикъяс да капиталистъяс. Временнӧй правительство эз дугды воюйтӧмысь, рабочӧйяслы кокньӧд эз ло, крестьяналы эз сетны му. Кӧкъямыс тӧлысь мысти, октябрын, рабочӧйяс да крестьяна вӧчисны коймӧд революция — шыбитісны временнӧй правительство, босьтісны асланыс киӧ власьт.