ӦКМЫСӦД ВО САРТӦГ
Ӧкмыс во сайын талунъя лунъясӧ лои став Рочму кузя революция. Рабочӧй да крестьяна шыбитісны сарӧс. Выль том йӧз эз аддзывны лёк сардырся олӧмсӧ. Ёна дыр сарыд вир юис. Медся сьӧкыд вӧлі уджалысь йӧзлы. Долыдлун налы сэки эз волы. Чераньяс моз вӧлі кӧласьӧмаӧсь крестьяна сьылі вылӧ озыр войтыр. Быд буртор корсьӧм, велӧдчӧм сарыд вӧлі пӧдтӧ.
Уна бур йӧз вермасисны саркӧд. Уна во лои пуктыны, кытчӧдз эз усь сылӧн власьтыс. Пӧлича да плеть вылын сулаліс тайӧ власьтыс. Коді кутчысьліс норасьны саркӧд, мездыны уджалысьясӧс озыр йӧз кабыр улысь — сійӧс вӧлі виӧны, сюйӧны тюрмаӧ, ыстӧны ссылкаӧ. Попъяс ёна отсасьлісны сарлы. Пемыд войтыр дыр кывзісны налысь ылӧдлӧм. Эз на вӧв мичаӧ воссьӧма синмыс крестьяналӧн.
Регыдӧн-дырӧн вын уджалысьяслӧн соді. 1914 воын лои бара война. Сэки нин синъяс дзикӧдз воссисны. Рабочӧй да крестьяна мӧвпыштісны, казялісны, мый вӧсна мунӧ тайӧ войнаыс, кодлы сійӧ колӧ. Куим во муніс война. Олӧм кутіс киссьыны, уна миллион мортӧс виисны, ранитісны, воштісны калекаӧ, а войналӧн некӧн на помыс эз тыдав. Тадзи став уджалысьяс воисны пикӧдз. Некутшӧм югыд эз кут водзын тыдавны. Сэки став рабочӧй да крестьяна ӧтувтчӧмӧн сувтісны, шыбитісны нэмӧвӧйя врагӧс, путкыльтісны важ олӧм.
Сар эз ло. Лои выль права. Сӧмын ужалысь йӧзлы тайӧ вежсьӧмсьыс ыджыд буртор эз ло. Власьт босьтісны капиталистъяс да помещикъяс. Крестьяналы колӧ вӧлі му. Муыс вӧлі помещикъяс ордын. — Выль правительство эз сет мусӧ. Рабочӧйяс вӧлі корӧны пуктыны ассьыныс дӧзьӧритӧм (контроль) пабрик-заводъясӧ. — Правительство сідзжӧ эз сет тайӧ правасӧ. Россияын олӧны уна мукӧд сёрниа войтыр. Найӧ корлісны торйӧдчыны ас ногӧн овмӧдчыны. Тайӧ правасӧ эз жӧ сетны. Медся колантор став уджалысь йӧзлӧн вӧлі: война помалӧм. — Война эз кус.
Капиталистъяслы ыджыд отсӧг вӧчисны меньшевикъяс да эсеръяс. Тайӧ кык партияыс тшӧтш кутісны власьт. Крестьяна да рабочӧй вӧлі виччысьӧны насянь мездӧм озыр йӧзӧн нартитӧмысь. Вӧлӧмакӧ, крестьяна виччысьӧны весьшӧрӧ. Долыдлун эсеръяс эз вайны.
Сӧмын коммунист партия индіс веськыд туй. Лои Октябрса революция, кор мырддисны озыръяс кипод улысь власьт. Октябрса революция дзикӧдз путкыльтіс важ оласног, сетіс став права да вӧля уджалысь йӧзлы. Кӧкъямыс во чӧж нин олӧ Сӧвет власьт. Ми воысь воӧ кыптам, ёнмам. Быдпӧлӧс удж чорыда мунӧ. Ставсӧ вӧчам асьным, бокисянь отсавтӧг.
Водзӧ шуам: энӧ вунӧдӧй Ленин ёртлысь ыджыд тшӧктӧмсӧ — ёнмӧдӧй рабочӧй да крестьяна кост ӧтувтчӧмсӧ!
