ЛИШНӦЙ МУ КОМИ ОБЛАСЬТЫН АБУ

Февраль 12 лунӧ заседанньӧ вылын Коми Обисполком шуис: «Коми обласьт пасьта лӧсьӧдӧм муяс зэв этша, некутшӧм земельнӧй обществоын абу лишнӧй му; сы вӧсна выль олысьяслы позьӧ важ, лӧсьӧдӧм муяс вылӧ овмӧдчыны сӧмын общество кӧ ачыс лэдзас».

Тайӧ шуӧм йывсьыс лючкиджык колӧ висьтавны.

Унаысь сиктъясын олысь бокӧвӧй служащӧйяс (пельшӧръяс, школаын велӧдысьяс да мукӧд) местасӧ вештӧмысь полӧм вӧсна ли мый ли кӧсйӧны дзикӧдз овмӧдчыны сійӧ сиктас да видз-му уджалӧмӧ кутчысьны.

Сэсся бара жӧ сиктъясын эмӧсь бокӧвӧй ремесленникъяс (вурсьысьяс да мукӧд) либӧ сійӧ земельнӧй обществоса нывъясӧс вайысь бокӧвӧй мужикъяс, кодъяс зэв нин дыр олісны каръясын да заводъясын. Найӧ сиктъясас локтӧм бӧрын бара жӧ корӧны му-видз. Крестьяна скодъяс вылын лӧсьӧдавласны сэтшӧм йӧзсӧ обществоас не босьтны, му-видзсӧ оз сетны. Найӧ (земельнӧй обществоясыс) тадзсӧ лӧсьӧдӧмнас вӧчӧны закон серти (Видз-му зак. чук. 46 ст.). Сӧмын сэтшӧм видз-мусӧ корысь йӧзыс водзӧ ыстысьӧны — волисполкомъясӧ, уездувса видз-му управленньӧясӧ, мед найӧс лэдзасны земельнӧй обществоас да видз-му сетасны.

Волисполкомъясыс да уездувса видз-му управленньӧясыс вермӧны (Видз-му закон чукӧр сійӧ жӧ 46 ст. серти), эм кӧ обществоас лишнӧй му-видз, пыртны сійӧ обществоас выль олысьясӧс да сетавны налы видз-му, земельнӧй обществоыс кӧть и оз сӧгласитчы сы вылӧ.

Ӧні, Обисполком шуӧм бӧрын, видз-му юкӧдъяс, волисполкомъяс оз нин вермыны выль олысьясӧс пуксьӧдны крестьяна муяс вылӧ, ӧні крестьяна сӧмын асьныс видз-му вылын ыджыдӧсь. Земельнӧй обществоса шленӧн вермас лоны да видз-му босьтны сӧмын коді: 1) видз-му обществоса шлен либӧ общество приговорӧн босьтӧмаӧсь обществоас, 2) чужӧма кӧ обществоса шленъяссянь, 3) гӧтрасьӧма кӧ общество шлен вылын да ӧтпыр жӧ овмӧдчӧма выль оланінас (мужик ордас либӧ баба ордас) сійӧ земельнӧй обществоас.

Видз-му управленньӧын юралысьлӧн вежысь Исаков.

Видз-му лӧсьӧдан удж нуӧдан юкӧдӧн заведуйтысь Куклин.