ВИДЗӦЙ ПОРСЬЯСТӦ ВИСЬМӦМЫСЬ

Порсьяс пӧвстын паськалӧ ёна ӧти висьӧм. Сійӧ висьӧмсӧ зэв сьӧкыд лечитныс. Нуӧдӧ висьӧмыс зэв чорыда. Тайӧ висьӧмсьыс мукӧдінъясын кувлі быд сё висьмӧм порсь пиысь ветымын куимсянь кӧкъямысдас порсьӧдз. Висьмӧны пӧрысь и том порсьяс. Висьӧмыс зэв вуджысь. Ӧти порсьсянь мӧд порсьӧ вуджӧмӧн вермас паськавны став сикт пасьта, мукӧддырйиыс паськалӧ быдса уездъяс, обласьтъяс пасьта. Мукӧд скӧтлы тайӧ висьӧм оз вудж.

Мыйӧн казялан порсьлысь висьӧм, колӧ пырысьтӧм-пыр шыасьны скӧт лечитысь пельшӧр дінӧ либӧ врач дінӧ. Дырджык кӧ он шыась, надеяыс порсь бурдӧм вылӧ зэв этша.

Тайӧ висьӧмсӧ позьӧ тӧдны со мый серти: висьмӧм бӧрын порсьыд куйлӧ пыр вӧрзьӧдчывтӧг, юрсӧ нюжӧдӧмӧн; сёйны-юны ньӧти оз кут. Лун-мӧд мысти висьмӧм бӧрас туша кузяыс, медсясӧ нин морӧс бокъясас, мышку вылас, бӧр кокъясас да голяас лоӧны сімгӧрд либӧ пемыдлӧз гӧгрӧс чутъяс. Сэсся порсьыдлӧн лоӧ запор, синъясыс гӧрдӧдасны, восӧдны моз сійӧс кутас, а бӧрас заводитас мытитны.

Тайӧ ставыс лоӧ лун кык-куимӧн. Нёльӧд лунас порсьыд кулӧ нин. Шочиника олӧны лун кӧкъямысӧдз. Мукӧддырйиыс порсьыд быттьӧ бурдлас нин (сідзсӧ порсьпиянкӧдджык), сэсся лун 6−12 мысти друг бара висьмасны: пӧдӧны, кызӧны, сэсся и кулӧны.

Мед висьӧмыс тайӧ оз паськав, колӧ со мый вӧчны: 1) висьысь порсьясӧс колӧ видзны торйӧн дзоньвидза порсьясысь. 2) Сэтчӧ оз ков лэдзны мукӧд скӧтӧс да бокӧвӧй йӧзӧс. Найӧ асланыс кокъяснас вермасны висьӧмсӧ вуджӧдны мукӧд порсьяс вылӧ. 3) Скӧт лечитысь пельшӧр либӧ врач видлавтӧг оз ков начкавны порсьясӧс.

Сэсся бурджыка колӧ видзны дзоньвидза порсьястӧ карта вылын, оз ков лэдзны найӧс ывла вылын ветлӧдлыны.