ВЕЛӦДЧӦЙ УДЖАВНЫ КООПЕРАЦИЯЫН

Кооперацияын уджалысьяслы март 8-ӧд лунӧ колӧ ёнджыка думыштны нывбабаяс йылысь, налысь оланногсӧ лӧсьӧдӧм йылысь. Важӧн кӧ, сар дырйи, налы оз вӧлі сетны некутшӧм туй пач да кага дорын ноксьӧм кындзи, ӧні налы колӧ паськыдджыка восьтыны туйсӧ, мед эськӧ найӧ вермисны мунны югыдлань, мед эськӧ вермисны найӧ и йӧз костын уджавны.

Сӧмын велӧдчытӧг тайӧ уджсӧ нуӧдны ӧні нывбабаяс унджыкыс оз на вермыны, важӧн найӧс сэтчӧ эз велӧдлыны. Налы ӧні колӧ зіля велӧдчыны. Бур школа пыдди вермас лоны кооперация, сэні нывбабаяс вермасны велӧдчыны кооперация овмӧс нуӧдны, кооперация пырыс вермасны ӧтувтчыны да ӧтвылысь дорны аслыныс югыдлунсӧ.

Колӧ нывбабаяслы индыны удж правленньӧясын да ревизионнӧй комиссияясын. Сэні найӧ матісяньджык аддзасны кооперация уджсӧ, асьныс мыйкӧ мында кутасны тшӧтш уджавны — сэки, дерт, найӧ регыдджык велаласны асьныс прамӧя уджавны. Шуам, правленньӧ арталӧ, кысь да кутшӧм тӧвар колӧ ньӧбны. Арталігас нывбабаяс, ӧти ногӧн кӧ, вермасны правленньӧыслы пӧльза сетны колан тӧварсӧ индӧмӧн, а мӧд ногӧн кӧ, найӧ велаласны тӧваръяссӧ ньӧбны. Сэсся тӧвар дон лӧсьӧдігӧн бара жӧ колӧ, мед нывбабаяс сійӧ тӧдісны. Сэки найӧ, ӧтарсяньыс, велаласны сійӧ уджас, а мӧд-кӧ, найӧ озджык кутны лёкӧн видзӧдны асланыс лавкаын вузасьӧм вылӧ да ёнджыка кутасны радейтны кооперациясӧ. Огӧ кӧ нывбабаястӧ ми кутӧ сибӧдны дон лӧсьӧдігӧн, сэки найӧ вермасны шуны, кооперация пӧ донӧн вузасьӧ, уна барыш босьтӧ, а сы вӧсна кутасны сэсся и кедзовтны кооперациясӧ. Сэсся ревизияяс вӧчалігӧн уна пӧльза позьӧ сетны нывбабаяслы.

Тані нывбабаясыд бара жӧ вермасны уна буртор вӧчны дай сы кындзи матынджыкӧсь лоасны кооперация удж дорас, регыдджык велаласны кооперацияас уджавны. Тайяс кындзи колӧ унджыкысь нывбабаяслы висьтавлыны кооперация йылысь. Делегатскӧй собранньӧяс вылын дай мукӧдлаын колӧ вӧчавны докладъяс: кутшӧм пӧльза сетӧ кооперация, кысь сійӧ да мый вӧсна лоӧма. Тӧдмаласны кӧ тайӧс нывбабаясыд, найӧ зільджыка мӧдасны кооперацияас уджавны.

Зэв уна ногӧн позьӧ велӧдны нывбабаясӧс кооперацияын уджавны. Сӧмын тані индалӧм серти кӧ кутам уджавны, уна буртор вермам вӧчны. Сӧмын колӧ зільлун кооперацияын уджалысьяслы, уджавны кужысьяслы. Ёнджыка кӧ найӧ босьтчасны нывбабаясӧс велӧдан уджӧ, регыдджык кыпӧдасны нывбабаясӧс, регыдджык велӧдасны найӧс уджавны кооперацияын.

Кооперацияын уджалысьяс, мыччӧй ассьыныд кырымнытӧ нывбабаяслы да велӧдӧй найӧс ӧткодя тіянкӧд уджавны!

Нывбабаяс, пырӧй кооперацияӧ да сы пыр бурмӧдӧй ассьыныд олӧмнытӧ!

Н. Рам.