КОКНЬӦДӦЙ АСЬНЫТӦ, БУРМӦДӦЙ ЧЕЛЯДЬЛЫСЬ ОЛӦМ!
Матысмис ставмувывса нывбаба лун. Коми аньяс кутасны сійӧ лунас сёрнитны асланыс олӧм йылысь, вӧчӧм удж йылысь да мыйясджык колӧ вӧчны водзӧ сьӧкыд ӧлӧм кокньӧдӧм могысь.
Нывбаба овмӧс.
Нывбабалӧн зэв на сьӧкыд олӧм. Войсяньыс чеччас сійӧ да войӧдз мырсьӧ аслас овмӧс гӧгӧрыс. Гожӧмнад удж дырйи нывбабалы ещӧ нин сьӧкыд. Сылы видз-му вылын лоӧ уджавны мужиккӧд радъя, вӧчны горт гӧгӧр став уджсӧ дай посни челядьыдкӧд мукӧддырйиыс лоӧ войястӧ синтӧ куньлытӧг овны. Видз-му вылад уджалігӧн аньлӧн пыр сьӧлӧмыс челядь вӧснаыд висьӧ; мед эськӧ найӧ оз доймыны кытчӧкӧ, мед оз пакӧститчыны, мед нинӧм эськӧ эз ло накӧд. Медся нин омӧль, абу кӧ бур кага видзысь.
Челядьӧс быдтӧм.
Посни челядь миян, медся нин гӧль крестьяналӧн, быдмӧны бура дӧзьӧриттӧг, кыдзсюрӧ. Тадзтӧ кыдзсюрӧ няйт пиад быдмигӧн челядь ёна висьӧны, доймалӧмӧн воӧны немортӧ, кулӧны. Висьысь челядь курыд шог мамъяслы, лишнӧй сёйысь семьяын, а нэмчӧжся висьӧм кӧ сюрӧ, челядьыд быдмасны да ас вылас абу радӧсь.
Быд мортлӧн вежӧрыс аслас дзоньвидзалун серти. Юр вежӧр — юр вем уджалӧм. Бур юр вем сӧмын дзоньвидза мортлӧн вермас лоны, кор бура сылӧн уджалӧ лючки гӧгӧр (яй-вир, сьӧлӧм, син-пель да сідз водзӧ). Быдӧнлы колӧ зільны, мед челядьысь лоӧны вежӧра дзоньвидза йӧз. А унджыкыс челядьӧс дӧзьӧритӧм йылысь оз на бура мӧвпыштлыны.
Быд пемӧс ичӧтдырйи ворсӧ, ворсӧмӧн велӧдчӧ овны, а ми челядьӧс ӧлӧдам ворсӧмысь, пуксьӧдам ичӧтысянь потан бердӧ лунтыр кежлӧ, гожӧмбыд кежлӧ. Ворсӧмысь нӧйтам, игналам томан сайӧ. Челядьлы колӧ ворсӧм ывла вылын, колӧ налы гож водз, долыдлун. Мӧвпыштӧй, коми аньяс, ассьыныд ичӧтдырся олӧм, энӧ кутӧй челядьӧс ворсӧмысь!
Тӧждысьӧй челядь вӧсна.
Нывбабалы ёна сьӧктӧдӧны олӧмсӧ челядь, а мӧдарсяньыс и челядьясыслӧн олӧмыс зэв омӧль.
Мый нӧ колӧ вӧчны, мед эськӧ челядьыс бурджыка дӧзьӧритӧмӧн быдмисны дай нывбабалы мед вӧлі ичӧтика кад шойччыштны, тӧдмавны мыйсюрӧ (а тӧдмавны колӧ сылы зэв уна!)?
Гӧль йӧзлы нуждаысь петан туй ӧти — ӧтувтчӧм. Колӧ ӧтувтчӧмӧн лӧсьӧдны челядьӧс видзанінъяс: детскӧй садъяс, площадкаяс, яслияс. Сӧмын тадзи ми вермам кокньӧдны нывбабалы дай челядьӧс бурджыка дӧзьӧритны. Детскӧй сад зэв буртор. Сійӧ уджалӧ во гӧгӧр, велӧдӧ 4−7 арӧса челядьӧс, сӧмын ӧні ёна паськӧдны сійӧс огӧ на вермӧй. Дерт, заводитчыныс колӧ, колӧ тӧждысьны та йылысь. Но площадкаяс да яслияс бердӧ колӧ кутчысьны ёна.
Найӧ воссьылӧны сӧмын гожӧм кежлӧ, сы вылӧ уна сьӧм оз ков. Колӧ ӧнісянь жӧ заводитчыны чукӧртны сьӧм сы вылӧ. Та йылысь колӧ ёна сёрнитны, мед гӧгӧрвоас быд ань. Делегаткаяс, велӧдысьяс, избачьяс, коммунистъяс мед нуӧдасны тайӧ сёрни нывбаба костын, велӧдасны, кыдз кутчысьны удж дінӧ, отсасясны быд ногӧн. Ӧнісянь жӧ колӧ быд сиктын заводитны чукӧртны сьӧм та вылӧ нывбаба да крестьяна костын. Мед отсыштасны кооперативъяс, мӧда-мӧдлы отсасян комитетъяс.
Коми нывбаба, вайӧ жӧ ӧтвылысь сьӧлӧмсьыныд босьтчылӧй бур олӧм дорны, ас бӧрсяыд нуӧдӧй мукӧдӧс!
Теров Митрей.
