КОМИ АНЬЯС, ЛӦСЬӦДӦЙ ВЫЛЬ ОЛӦМ!

Аскомысь став му пасьта уджалысь нывбабаяслӧн ыджыд лун. Дас квайт во нин сулалӧ тайӧ праздникыс. Повтӧм, збой сьӧлӧма нывбабаяс лӧсьӧдісны тайӧ лунсӧ. Воддза кывсӧ та вӧсна шуис Клара Цеткин, коді став асьыс нэмсӧ пуктіс вермасьӧм вылӧ озыр йӧзкӧд. Тайӧ ыджыд лун вӧчисны сы вӧсна, мед ӧтувтчӧмӧн чукӧртны вын, мездысьны озыр йӧз нартитӧмысь да шыбитны налысь власьт.

Зэв сьӧкыд овны озыр йӧз кипод улын. Ёна вир юысьяс нартитӧны уджалысьясӧс. Важӧн нин эськӧ уджалысьяс вермасьӧны накӧд, да сӧмын на Рочму вылын помӧдз шыбитісны озыр йӧзӧс. Локтан праздникӧ мукӧд мувывса аньяс кутасны лыддьыны ассьыныс вынсӧ, чорыдджыка ӧтувтчасны ас коммунист партия гӧгӧр да мездысясны озыр йӧз кабыр улысь.

Миян Сӧвет Республикаын олысь нывбабаяс ӧтувтчасны думнас ылыс дона чойяскӧд, ыстасны найӧлы ыджыд чолӧм да бурсиӧм. Тайӧ лунӧ нывбабаяс петкӧдласны, лыддясны ассьыныс вӧчӧм уджсӧ, кодӧн отсалісны кыпӧдны выль олӧм. Тайӧ лунӧ став уджалысь йӧз, миян Совет власьт и партия кутасны сетны отсӧг нывбабаяслы выль олӧм вӧчигӧн.

Коми аньяс, энӧ вунӧдӧй ассьыныд ыджыд луннытӧ! Чукӧртчылӧй, сёрнитӧй — кыдзи чорыдджыка босьтчыны, шыбитны пемыдлун, кокньӧдны сьӧкыд олӧмнытӧ! Зільджыка кутчысьӧй уджавны йӧз костын, Советад да кооперативъясад! Топӧдчӧй коммунист партия бердӧ!