ПРӦМЫШЛЕННИК ДА ЧУКЛЯ

(Мойд)

Важӧн оліны-выліны гозъя; оліны-выліны дай мужикыс мӧдіс угоддьӧӧ вӧравны.

Угоддьӧ мужиклӧн вӧлі бура ылын, запастор босьтыштіс бура уна. Муні и воис керка дорӧ, пондіс первой сьӧла кыйны; чӧс туйяссӧ сиаліс и пондіс кыйсьыны. Ягын зэв уна вӧлі пӧткаяс: сьӧлаыс-ӧ, тарыс-ӧ, дозмӧрыс-ӧ, урыс-ӧ, быд кутшӧмторйыс. Мужиклы пондіс бура-бурас прӧмыс сюрны.

Ӧтпыр воис керка дорӧ, мудзис ёнас, пуксис дай шуис: «Со, эськӧ, меным татчӧ кӧ тӧварыш таво, ми, эськӧ, со, сэки кымынкӧ прӧмыс вермим жӧ йӧрны!»

Мужик водзӧ пестор керис да ватор катіс дай пондіс пусьыны; рытсӧ эз на удит ужнайтны, а кодкӧ воис морт керка дорас дай юасис: «Узьны он-ӧ лэдз менӧ?».

Мужик первой чистӧ повзьыліс дай шуис: «Лок жӧ, узь!».

Морт пырис и пондіс кульсьыны, а мужик шуис: «Вай жӧ лок ужнайтам, менам шыд пуӧма!».

— Но вай, ладнӧ...

Пондісны сёйны.

Сёйигӧн пондіс мужик юавны: «Кысь тэ татшӧм морт воин ме дінам?».

— Ме вои тэ дінад вошӧм морт, ӧдва ме вои.

Водзӧ сідз-тадз сёрнитыштісны дай мужиклысь юаліс морт: «Он-ӧ босьт менӧ тшӧтш вӧравныстӧ?»

Мужиклы сэтчӧдз и рад: «Вай, вай, — шуас, — меным ӧтнам гажтӧм жӧ лои-а».

Водзӧ найӧ узисны кыдзкӧ. Асыв сувтісны, пуисны сёйны и пондісны мӧдны ягӧ чӧс туй кыйны.

Ветліны и воисны: мужиклы сюри зэв уна, а воысь мортлы кык сы мында сюрӧма.

Мужик зэв дивуйтчис: «Кыдз тэныд та мында со сюри?».

А мӧдыс шуис: «Сюри тай!».

Сійӧяс да вӧраліны вежалун, а воысь морт вексӧ уна ваяс мужикысь да и кык мындаӧн.

Мужик повзис, думайтчыны пондіс: «Мыйла тайӧ татшӧм морт? Мед жӧ, ме тайӧ вӧчла лёк туй вылӧ»...

Мужик вӧчис лёк туй вылӧ, кытчӧ эз сметит пӧткалы пырны, а сійӧ морт зэв уна вайис.

Мужик казяліс, что тайӧ абу бур морт, а сійӧ вӧлӧма ягса Чукляыс: кор мужикыс желайтіс тӧварышсӧ, сэки сылы и сибаліс ягса Чукляыс. Мужиклы Чукля зэв уна прӧмыс ваяліс.

Мужик думайтіс пышйыны гортас, шуас: «Абу жаль немтор, а колӧ кыдзкӧ та дінысь мынтысьны».

Ӧтпыр мужик и мӧдны кӧсйис. Асывводз сувтісны, пусины сёйны. Мужик Чукляӧс ыстіс ыджыд туй кыйны, а ачыс кустор босьтіс да и пышйыны мӧдіс гортас.

Муні, муні дай сёйнысӧ ковмис и пуксис мыр вылӧ, пондіс кус сёйны. Видзӧдас, а кодкӧ локтӧ морт. Мужик зэв повзис, думайтіс, вӧтас Чукляыс. Пондіс молитчыны Микӧлалы, шуалас: «Микӧла милӧсьтливӧйӧ, эн сет менӧ Чуклялы травитлыны».

А локтысьыс и шуас: «Эн пов, ме локта тэнӧ видзны, мʼоз чашкӧдлы Чукляыс!».

Мужиклы зэв рука лои. Пондісны кывзыны — шум кылӧ бӧрын. Видзӧдасны, а Чукляыс шумӧн вӧтас. Кор найӧяс дінӧ пондіс воны Чукляыс, пондіс шуавны: «Суи жӧ ме ӧд, эн жӧ вермы ме водзсьым некытчӧ дзебсьыны!».

А Микӧлаыс и шуис: «Лок матӧджык, ми на татӧн кыкӧн!».

Чукля пондіс матӧдчыны, а матӧтӧ и оз сибав.

Водзӧ Микӧлаыс босьтіс Чукляӧс юрси куӧдыс да нюкыртіс кок улас да зорйӧн нӧшаліс да нӧшаліс, вексӧ и шуас: «Нӧшта-ӧ мортӧдз вошъян?».

А Чукля воча шуас: «Лэдз менӧ, водзӧ некор ог вошйы мортӧдз!».

Микӧла шуас: «Смотри! Ме тэныд!... Коркӧ кӧ вошъян мортӧдз!».

Чукля ӧткажитчис нэм кежлӧ, шуас: «Некор ог вошйы!».

Сы бӧрын Микӧла шуис мужиклы: «Вай жӧ кос бӧрӧ керка дорад да вӧрав, некоді водзӧ тэ дінад оз сибав!».

Мужик водзӧ юаліс: «Тэ инӧ коді вӧлін татшӧм мортыс?».

Мӧдыс висьтасис, шуас: «Ме вӧлі Микӧла пӧль!»

— Но ладнӧ инӧ, оз сибав некоді — косала бӧрӧ.

Мужик бӧрӧ воис керка дорӧ и пондіс бӧра вӧравны. Мужиклы зэв уна сюри прӧмыс. Чукля сылы сибавлі да ваяліс вося урсӧ и сьӧласӧ. Мужиклы лои видзны прӧмыссӧ тӧлӧдз: зэв уна сюри да некыдз эз вермы кыскавны.

Тӧвсӧ мужик кайліс керка дорас прӧмысла сизим вӧлӧн, прӧмыс лои сизим вӧв додь тыр. Гортас вайӧдіс да вузавліс дона-донысь и ӧні на олӧ-вылӧ...

Тайӧ мойдсӧ гижис А. С-лы «Кӧрттувъя» сиктысь Йӧртым вӧлӧсьтувса морт В. Качин*.