ГӦНА ПЕЛЬ

(Ина^Быль. Редакциялӧн пасйӧдъяс./^)

Гӧна Пель вӧлӧм мортъястӧ шуӧ «куш пельясӧн». Важӧн пӧ чуркатӧ керигӧн век Гӧна Пель волывлӧ «куш пельяс» дінӧ, век накӧд ворсӧ — кор паличӧн кыскасьӧ, кор бертчӧ. Сійӧ вӧлӧм тӧдмалӧ — ён абу «куш пель». Ӧти «куш пельлы» Гӧна Пель вӧлӧм век вермӧ, паличӧн кыскӧ. Ӧтпыр сійӧ «куш пель» сюсьмӧдчас да гортсьыс зэв ён гез катас. Ӧтик гез помсӧ сійӧ кыз, ён мырйӧ кӧрталас, а мӧд помас кӧрталас паличлы. — Воас Гӧна Пель. — Пуксясны кыскасьны. Гӧна Пель тараблятчас, тараблятчас — оз вермы кыскыны «куш пельӧс». — «Аттӧ, — шуӧ Гӧна Пель, — „куш-пель“ ён жӧ вӧлӧма, век, тыдалӧ, ёнмӧ лунысь-лун».

Ӧти вӧралысь морт керӧма вӧр шӧрӧ керка. Сы керкаын сійӧ тӧвъяснас дай мукӧд пӧраясӧ вӧлӧм овлӧ: кор ур лыйлас, кор дозмӧр. Вӧралысьыд абу тӧдӧма, керкасӧ керӧма сэтчӧ, кыт ветлӧдлӧ вӧлӧм Гӧна Пель, сы туй вылӧ. Вӧралысьтӧ Гӧна Пель кутчас век ёна повзьӧдлыны, прӧмыссӧ дажӧ сёйӧ мукӧд пӧра. Вӧралысь оз тӧд, код тайӧ прӧмыс гусявлӧ, — век чайтӧ кутшӧмкӧ мӧд вӧралысь вылӧ. Ӧтпыр казяліс сійӧ Гӧна Пельтӧ. Вӧралысьлӧн вӧлі пон. Понйыс вӧлі, кыдз миян шуӧны, нёль синма. Сійӧ вӧлӧм Гӧна Пельтӧ аддзӧ. Кор Гӧна Пель воас, сэк пон увтӧ. Вӧралысь кывзӧ керка пытшкын, а Гӧна Пель дымӧвӧлӧкӧ бут! — сетіс. Дымӧвӧлӧк вель ылӧ чеччыштіс. Вӧралысь думыштіс: «Тайӧ, кӧнкӧ, Гӧна Пель», — чеччис и петіс. Сійӧ вӧлі тӧдӧ, кыдз колӧ Гӧна Пельӧс повзьӧдны и вӧтлыны: лыян кӧ пӧ кок вож коласті бӧрвыв, Гӧна Пель сэсся оз волы некор. Вӧралысь зарадитіс пищаль, лыйыс кок вож коластіыс.

Гӧна Пель шуӧ: «Кужин жӧ овны». Сэсся Гӧна Пель пышйис и некор эз волы сы керка дорӧ, эз кутчы ветлӧдлынысӧ туй вывті.

Гижӧма Туръяыбса Г. Старцев дедыслысь, Емдінса Коми Семинарияын велӧдчигӧн.