ПЕРА

Коми муын, Пермакланьын, оліс вӧрын, Лупъя раскын, ён морт Пера, вокыскӧд. Пера вӧлі ёна кыйӧ быдсяма зверӧс. Вокыс дышмис вӧрын олӧмысь да сэсся ий муніс Коммуса князьлы служитны. Пера коли ӧтнас. Коркӧ дыр мысьт Коммуса князь вылӧ сувтӧма войнаӧн лунвывса сар да сійӧ пондӧма ӧбӧдитны аслас сюсь йӧзнас, кодъяс кужӧны вӧлӧм ветлыны «кӧлесаӧн» да зэв ёна вермӧны жугӧдны йӧзӧс. Коммуса князьлы вӧлі некытчӧ нин воштысьны. Сэн локтіс сы дінӧ Пералӧн вокыс ий шуӧ: «Менам пӧ эм Пера нима вок, зэв ён, сійӧ кӧ оз вермы тайӧяскӧд водзсасьны, сэсся некод нин оз вермы».

Сэн Коммуса князь ыстіс сійӧс корны Пера вокӧс. Пера вӧлі сэтшӧм ён: пывсян кодь изъяс вӧлі вӧдитӧ мачӧс моз; сэтшӧм сюсь лызьӧн ветлыны: юрас кӧ кӧрталас дас кык сывъя сюмыс, сюмыслӧн помыс муас оз инмывлы мунігас.

Пералӧн вокыс воліс сы дінӧ князь дінсянь да ий шуӧ: «Менӧ ыстіс князь тэ дінӧ, корӧны тэнӧ воюйтны да дорйыны сійӧс лёк йӧзысь». Жаль вӧлі Пералы кольны ассьыс чужан мусӧ, но вокӧс да князьӧс дорйӧмысь эз ёна пыксьы и мӧдӧдчис найӧ князь дінӧ.

Пера муніс быттьӧ ньӧв, вокыс сійӧ эз ий аддзыв. Пера воліс воюйтанінӧ, кутіс шензьыны. Коркӧ суліс сійӧ вокыс, кутіс висьтавлыны сылы, со пӧ тай кӧлесаыд локтӧ, верман кӧ, кут сійӧ да ви. Пера ӧтик кӧлесаӧс кватитіс да чуш-чашвартіс! Сэсся мӧдӧс!... Коймӧдӧс!... И сідзи ставсӧ. Кор быри лунвывса сарлӧн став йӧзыс, найӧ бергӧдчисны бӧр.

Пера аддзис ассьыс виалӧм йӧзсӧ, сэсся повзис и кутіс думайтны. Сэсся шуӧ вокыслы: «Вот ме мыйта морт вии... Менӧ татысь судитасны, лоӧ пышйыны».

Сэн вокыс шуӧ: «Дугды, Пера вокӧй! Эн думайт, мый тэ лёк вӧчин миян князьлы, тэ вӧчин зэв ыджыд бур и сійӧ тэнӧ наградитас». Сэн мунісны найӧ князь дінӧ. Пералӧн вокыс висьталӧ князьлы: «Со тай тэнӧ дорйысьыд, ыджыд князьӧй, — не тайӧ кӧ, миянӧс виалісны ставӧс!» Князь шуӧ Пералы: «Бур том молодечӧй! Кор тэ менсьым, мый тэн колӧ, ставсӧ верма сетны: зарни кӧть дона звер куяс». Пера шуӧ князьлы: «Меным оз ков зарни, зверсӧ ме ачым кыя». — «Кодыр тэ кыйсьысь морт, сета ме тэныд шӧвк звер кыян тыв^«Казь»./^. Сэсся вӧрсӧ, кӧні тэ кӧсъян кыйсьыны, сета тэныд и тэнӧ некод оз кут дзескӧдны». Сэк Пера корис аслыс кыйсянін Лупъя рас и бӧр муніс важ оланінас (Лупъя раскӧ).

Лупъя раскын Вӧрса вӧлі ёна дӧсадитчӧ, век вӧлі корсьӧ, кыдз эськӧ сійӧ изведитны. Война вылысь локмысьт Вӧрса юалӧ Пералысь: «Кодыр тэ и кыдзи узян?» Шуӧ Пера сылы: «Ме узя уль кыдз пу краж моз, весиг ог лолав — шы ни тӧв». Воліс вой. Вӧрса пондіс виччыны Пералысь узьӧм. Пера вольпасяс пуктіс кыдз пу гыр да шебрӧдіс эшкынӧн, а ачыс босьтіс ньӧв да кайис пӧлать сэрӧгас. Вӧрса локтіс, видзӧдӧ — джодж шӧрын вольпась, а вольпасяс узьӧ сэні Пера... Зырӧдіс, бытшкис копьёӧн кыдз пу гыръяд и шуис: «Коймӧдысь нин ме локті тэ дінӧ, вӧлисти тэ сюрин!» А Пера пӧлатьсянь лыйис ньӧвйӧн Вӧрсаӧс и шуис: «Тэ коймӧдысь, да эг сюр, а меным тэ ӧтчыдӧн шедін». Сэн пондіс Вӧрса Пераысь пышйыны асывлань Изйӧ, а Пера вӧтчӧ сы бӧрсянь, Пера суис Вӧрсаӧс Бӧлбан Изйӧ...

Вӧрса воліс гортас, керка порог вылас уси и кулі...

Тайӧ гижӧма Кырныша сиктын Курочкин ёрт, сэтчӧс морт, Сыктывкарын, Педтехникумын велӧдчигас.