КЕРЧОМЪЯ ВӦЛӦСЬТ
Исполком.
Керчомъяын (Кулӧмдін уездын) исполкомын уджалысьяс бурӧсь: юралысьыс партийнӧй, уджсӧ партъячейкаас тшӧтш нуӧдӧ. Секретарыс да шленыс абу эськӧ партийнӧйӧсь да, зэв бура, тӧлкӧн уджалӧны. Найӧ оз виччысьны час лыд помасьӧм, унаысь аддзылан рытъяснас занимайтчӧм.
Школа.
Вӧлӧсьтын эм кык школа, велӧдӧны шӧркоддьӧма, сӧмын катыд школаас велӧдысьясыс жалӧванньӧсӧ босьтӧм бӧрын самӧкур вылӧ уськӧдчылӧны. Велӧдчӧм йӧзлы абу эськӧ тадзинад мича.
Лыддьысян керка.
Избач томиник, 17 арӧса зон, уджавныс эськӧ уджалӧ да, сӧмын став уджыс ӧтнас вылӧ сӧлӧма, школаын велӧдысьяс да мукӧд велӧдчӧм йӧз оз отсыштны уджавныс. Быдсяма пӧлӧс кружокъяс эськӧ шулім восьтыны, да сідз на ставыс коли. Лӧсьӧдлім справочнӧй бюро, да некод сэн оз уджав, йӧзыс оз на тӧдны, мый Керчомъяын эм справочнӧй бюро.
Ликпункт
восьтӧма вӧлі кык, ӧтиыс деревняын 30 верст сайын, мӧдыс вӧлӧсьтын. Деревняса велӧдысь комсомолеч Гичев ӧти группа лэдзис нин, мӧдӧс заводитӧ велӧдны. Вӧлӧсьтас ликпунктыс кык тӧлысь мысти тупкысис, велӧдысьыс Шевелев ёрт эз кут вермыны велӧдны, уджалӧ мӧдлаын. Дерт эськӧ, тупкыныд эз жӧ ков да, мыйлакӧ тай Уполитпросвет тшӧктӧма.
Милиционер
ӧтнас справитчыны уджнас оз вермы, дай мортыс абу перыд. Вӧлӧсьтын лоны кутіс быдсяма омӧльыс; амбартӧ быд воӧ дасӧс ректӧны, турун зорӧдъясысь зэв ёна вошӧ, тышкасьӧны ёна, быд во нин ӧти-кык мортӧс виисны. Самӧкур пуӧны вывті ёна, мукӧдыслӧн нинӧм эз коль — ставсӧ юӧмаӧсь «чӧскыд-курыд самӧкурӧн».
Пельшӧр
роч морт, но уджалӧ ёна бура, унаысь лыддьывлӧ лекция лёк висьӧмъяс йылысь да мукӧдтор йылысь. Лун кӧть вой — висьысь дінӧ пыр ветлӧ, корӧны кӧ клубӧ кутшӧмкӧ уж вылӧ — локтӧ медводз. Сідзжӧ и бабка Попова Т. И. оз нинӧмысь повзьы, уджалӧ.
Кооператив.
Кооперативын регыд на вӧлі перевыбор, важ председательсӧ юӧм вӧсна лои вежны. Лавкаыс кыклаын. Ӧні выль состав заводитіс уджавны. Ревизионнӧй комиссияас сюрӧмаӧсь лёка дельнӧй йӧз.
Эм кредитнӧй тӧварищество, некутшӧм удж сэн оз мун. Деньгасӧ ставсӧ удждӧма, срокъясыс матысмӧны, а уджйӧзъяссӧ некод оз мынты.
Аддзысь.
