КОР КРЕСТЬЯНАЛӦН БЫРӦ ПРАВА МУӦН ВӦДИТЧӦМ ВЫЛӦ

«Коми Сикт» газетын (№ 7) вӧлі нин та йылысь гижӧд. Тані ми кӧсъям ещӧ неуна содтыштны сы йылысь.

1. Крестьянин кӧ видз-мусӧ вӧдитӧ омӧля: муяссӧ омӧля гӧрӧ, оз куйӧдавлы, шойччӧдлытӧг пыр ӧтарӧ сю нянь кӧдзӧ юклысьӧм (передел) виччысигмоз, потшӧсъяссӧ оз потш да ещӧ мукӧд ногӧн торкӧ му уджалӧмсӧ — сэтшӧм крестьяниныслысь вермӧны, вӧлӧсьтувса видз-му комиссия пыр, видз-мусӧ босьтлыны ӧти перемена кост уджалӧм дыра кежлӧ, а муясыс кӧ уджавсьӧ кыдзсюрӧ, перемена лӧсьӧдтӧг — позьӧ босьтлыны куим во дыра кежлӧ общество шыӧдчӧм серти либӧ земельнӧй органъяс (Вик, УЗУ и ОЗУ) шыӧдчӧм серти (Видз-му Зак. Чук. 61-ӧд ст.).

2. Сэсся крестьянинлӧн бырӧ видз-муӧн вӧдитчыны права, семья пытшсьыс кӧ (кӧзяйствосьыс) став шленъясыс кулалӧны да некод оз коль видз-мусӧ уджавны. Видз-муыс сэтшӧм кӧзяйствоясыслӧн кольӧ обществоыслы.

Тайясысь ӧтдор, крестьяналысь видз-му вермӧны босьтны, государстволы кӧ ковмас мелиорация нуӧдны, туйяс вӧчны, руда перйыны да ещӧ мукӧд сэтшӧмторъяс вӧчны, либӧ обществолы ковмас мыйкӧ стрӧитны аслыс. Та ногӧн кӧ крестьяниныслысь видз-мусӧ босьтасны ставнас либӧ колян видз-му вылас оз позьны кут кӧзяйствосӧ нуӧдны — сэки крестьяниныслы босьтан пыддиыс сетсьӧ выль местаысь видз-муыс. Кутшӧм убытка лоӧ крестьяниныслы видз-мусӧ босьтӧмӧн да выльлаысь сы пыдди сетӧмӧн, сійӧ убыткасӧ ас вылас босьтӧ видз-мусӧ крестьяниныслысь босьтысьыс (государствоыс, обществоыс). Босьтан видз-мусӧ кӧ бурмӧдӧм вылӧ крестьяниныслӧн уна труд да сьӧм вӧлі видзӧма, а сы дон пӧльзасӧ видз-мусьыс крестьяниныс абу на удитӧма босьтнысӧ, сетсьӧ жӧ сы вылӧ торъя дон.

Сэсся видз-мусӧ босьтӧм вӧснаыс кӧ крестьяниныслы лоӧ выль местаӧ вештыны стрӧйбаяссӧ — бара жӧ сы вылӧ сылы мынтыссьӧ. Босьтан видз-муясас кӧ абу крестьяниныс некутшӧм торъя уна труд пуктӧма да сьӧм видзӧма видз-мусӧ бурмӧдӧм вӧсна, а сӧмын уджалӧма да пӧльзуйтчӧма бурмӧдтӧг, сэки босьтан видз-му вылӧ некутшӧм торъя дон оз сетсьы.

О-В.М.У. Видз-му лӧсьӧдана удж нуӧдан юкӧдӧн заведуйтысь Куклин.