КОЛӦ БЫРӦДНЫ САМӦКУР ВӦЧӦМ ДА ЮӦМ

«Югыд туй» редакцияӧ быд лун воӧ уна письмӧ, коми войтыр норасьӧны, сиктъясын пӧ ёна самӧкур вӧчӧны да юӧны. Юӧны крестьяна, служащӧйяс, юӧны пӧрысь и том, юӧны нывбабаяс и челядьяс. Медъёна юӧны деревняса служащӧйяс. Талун ми лэдзам кымынкӧ гижӧд праздничайтӧмъяс йылысь.

Газет пыр, дерт, он вермы бырӧдны юӧмсӧ да самӧкур вӧчӧмсӧ. Колӧ мыйкӧ вӧчны. Первой-кӧ, самӧкур вӧчысьясӧс-вузалысьясӧс колӧ бырӧдны, колӧ найӧс чорыдджыка мыждыны. Сэсся служащӧйясӧс колӧ профсоюз пыр топӧдны ёнджыка, оз кӧ дугдыны юны — местаысь чӧвтавны.

Тайӧн он на дерт бырӧд юӧмсӧ, колӧ зэв ыджыдтор ещӧ вӧчны. Колӧ сиктъясын чорыдджыка босьтчыны пемыдлун бырӧдӧм уджӧ. Пемыдлун вӧсна, велӧдчытӧм вӧсна юӧны сиктса олысьяс. Колӧ лыддьысян керкаяс пыр ёнджыка уджавны, мед том войтыр юӧм пыдди лыддьысян керкаын пукалісны. Мед эз кыскы найӧс юысьяс дінӧ, колӧ спектакъяс вӧчавны, сэсся физкультураӧ босьтчыны.

Гырысьджык йӧзлы сідзжӧ колӧ лӧсьӧдны кутшӧмкӧ бурджык удж юӧм пыдди. Сэн, миян ногӧн, вермас отсавны кооператив. Колӧ быд вӧлӧсьтын восьтыны тшайнӧй, тшайнӧйын лӧсьӧдны газетъяс, нигаяс, судзӧдны граммофон. Тадзинад позяс ичӧтика бырӧдыштны юӧмъяссӧ.