ТИФӦН ВИСЬӦМ ЙЫЛЫСЬ

Тиф — ӧпаснӧй вуджан висьӧм. Медъёнасӧ сійӧ паськалӧ дурка, няйта олысьяс пӧвстын да чукӧра оланінъясын.

Тиф висьӧмыс мӧда-мӧдлы вуджӧ тойяссянь. Сідзкӧ, мед оз вудж тиф висьӧм, колӧ бырӧдны став тойсӧ. Тойяс позьӧ бырӧдны, кутан кӧ овны сӧстӧмджыка: тшӧкыдджыка пывсянын пывсьыны, вежлавны белльӧ, няйт кӧлуйсӧ бурджыка пеславны да пӧжны ёна пачын, а сэсся колӧ керка пытшкӧс видзны зэв пелька.

Вылын новлан кӧлуйын кӧ лоӧны тойясыс, колӧ найӧс ӧшӧдлыны пывсянын ли кӧн ли — зэв жараинын.

Пелька олӧм да тойясысь мынтӧдчӧм вермас мортӧс видзны тиф висьӧм вуджӧмысь.

Висьӧм новлӧдлысь той курччӧм бӧрас мортыс оз пыр висьмы. Сійӧ висьмӧ сӧмын лун 5−7 мысти. Мортыслӧн сэки жарыс кайӧ 40 градусӧдз либӧ ещӧ на вылӧ. Сэки висьысьыслы сёйны оз кут ковны, мышкуыс юкалӧ, мукӧддырйиыс тшӧтш киыс, кокыс, гӧгӧр быттьӧкӧ сылӧн висьӧ, кутас кынтыны да пӧсьӧ шыблавны.

Висьмӧмсяньыс 3 да 7 лунъяс костас висьысьыслы яяс ставсӧ кисьтас, чеччаласны гӧрд, а мукӧддырйиыс пемыдгӧрд чутъяс. Кисьтӧмыс тыртӧ висьысьыслысь став тушасӧ, кияссӧ дай кокъяссӧ.

Тифӧн висьӧны вежон куим кымын. Висьысьыскӧд сэки колӧ ёна кужӧмӧн да бура вӧдитчыны.

Висьмӧм бӧрын колӧ пырысьтӧм-пыр шыасьны доктор дінӧ, а висьысьсӧ торйӧдны дзоньвидза йӧзысь. Медбур висьысьсӧ нуны больничаӧ.

Тиф зэв сьӧкыд, ӧпаснӧй висьӧм. Видзчысьны сыысь кокньыдджык лечитӧм дорысь. Сы вӧсна колӧ овны ёна пелька да бырӧдны тойяс, лоӧны кӧ найӧ.