МЫНТӦЙ СЕЛЬХОЗНАЛОГ!

Государство чорыда кутас мыждыны сельхозналог мынтытӧмысь

Сельхозналог мынтӧмлы мӧд срокыс (февраль 15-ӧд лун) коли. Сӧмын бара на срок кежлӧ эз чукӧрмы колан налогыс. Февраль 15-ӧд лун кежлӧ став обласьт пасьтаысь колӧ вӧлі чукӧртны 150.518 шайт, чукӧртӧма сӧмын 118.665 шайт — сӧмын 78,8 прӧчент мында вӧлі колӧ чукӧртны мӧд срок кежлас, либӧ 55,1 прӧчент вося сельхозналог лыдсьыс. Сідзкӧ сельхозналог обласьт пасьта мынтӧма сӧмын джынйыс на.

Торъя уездъясын мынтӧмыс абу ӧткодь. Медводзын мунӧ Сыктыв уезд, сэн мынтӧма нин 49280 шайт — 88,8 прӧчент мӧд срокса налогсӧ, сы бӧрын оз ёна кольччы Кулӧмдін уезд — мынтӧма 37735 шайт — 84,4 прӧчент. Бӧрынджык кольӧ Изьва-Печӧра уезд — чукӧртӧма 13735 шайт — 75,4 прӧчент. Медъёна кольччӧма Емдін уезд; сэн чукӧртӧма 18193 шайт, сӧмын 55,5 прӧчент мӧд срок кежлӧ (38,9 прӧчент вося сельхозналогсьыс).

Тадзи водзӧ оз позь. Колӧ ёнджыка босьтчыны сельхозналог мынтӧмӧ.

Дерт, эмӧсь на сэтшӧм йӧз, кодъяс нарошнӧ оз мынтыны, нюжӧдӧны — думайтӧны: «Гашкӧ, прӧститасны, вунӧдасны, либӧ кыдзкӧ вермам мездысьны». Татшӧмъястӧ ӧні сідз оз кольны. Первоя срок кежлӧ мынтытӧмъяссьыс кӧ эз мыждыны, ӧні сідз оз ло. Волисполкомъяс вермӧны гижавны овмӧссӧ мынтытӧм крестьяналысь да дас лун бӧрти тӧрг вылын вузавны налогсӧ мынтӧм вылӧ.

Кодкӧ кӧ первоя срок кежлӧ налогсӧ эз мынты да сэк нин сылысь вӧлі гижалӧма овмӧссӧ, сэсся мӧд срок кежлас кӧ налогыс бара мынтытӧм сылӧн кольӧ, сэтшӧмъяссӧ кутасны кыскыны судӧ.

Народнӧй суд став мыжаяссӧ сельхозналог мынтытӧмысь кутас судитны Уголовнӧй Закон чукӧр 79 статья серти. Тайӧ статьяыс со мый шуӧ: мыжаяссӧ сельхозналог мынтытӧмысь мыждыны тюрмаын пукӧдавны квайт тӧлыссянь да унджык, овмӧссӧ сылысь ставнас либӧ кутшӧмкӧ юкӧн мырддьыны (конфискуйтны) да ещӧ кык мында сылысь налогсӧ перйыны.

Государство чорыда мыждыны кутас сельхозналог мынтытӧмысь. Коми крестьяна, энӧ сы выйӧдз воштысьӧй! Быдӧн мынтӧй сельхозналогтӧ!

Н. К.