КРЕСТЬЯНИН, ВЕЛӦД ВОЕННӦЙ УДЖ!
Миян Краснӧй армия ӧні зэв ичӧт, сӧмын коймӧд юкӧныс важ сар армия серти. Война кӧ лоӧ, ковмасны уна миллион косясьысь, сэтчӧдз армиясӧ колӧ сэки тыртны. Тыртны ньӧти военнӧй удж тӧдтӧм йӧзӧн оз шогмы. Бурджык миянлы ӧні велӧдны ставсӧ военнӧй уджӧ водзвыв, войнатӧм кадас. Тайӧ став йӧзсӧ военнӧй уджас велӧдӧмыс шусьӧ военизацияӧн.
Велӧдны колӧ ӧнісянь жӧ. Миян Сӧвет государство гӧгӧртӧмаӧсь быд боксянь капиталист государствояс. Найӧ ёна лӧсьӧдчӧны войнаӧ.
Крестьянаӧс военнӧй уджӧ велӧдӧм миян вывті на омӧля мунӧ, ньӧти на оз пӧшти. Лыддьысян керкаясын миян сӧмын кӧнсюрӧ на лӧсьӧдалӧма военнӧй уголокъяс.
Февраль 23 лунӧ Краснӧй армия празднуйтӧ ассьыс кӧкъямысӧд во тыран лунсӧ. Ӧкмысӧд во вылас миян колӧ лӧсьӧдны Краснӧй армиялы запас, кутчысьны велӧдны военнӧй уджӧ йӧзсӧ. Сы вӧсна Краснӧй армиялы кӧкъямыс во тыран лунӧ ми лэдзим лозунг — «Рабочӧй да крестьянин, велӧдӧй военнӧй удж!»
Медвойдӧр колӧ лӧсьӧдны лыддьысян керкаясӧ военнӧй уголокъяс. Тайӧ уджас колӧ кыскыны волисполкомӧс, сельсӧветӧс, тӧдысь йӧзӧс, корны налысь отсӧг быд ногӧн. Медъёна военнӧй кружокъясын уджас колӧ кыскыны уджавныс запасын сулалысь командиръяс да гортӧ локтысь красноармеечьяс. Налы колӧ нуӧдны тайӧ уджсӧ. Найӧ жӧ вермасны отсавны судзӧдны быдпӧлӧс колан литература: нигаяс, журналъяс, газетъяс да табличаяс.
Военнӧй уголок лӧсьӧдӧм бӧрын позьӧ кутчысьны мӧд уджӧ — кутчысьны военнӧй делӧ велӧдан уджӧ.
Запасын сулалысь командир, красноармееч либӧ избач вермасны нуӧдны беседаяс военнӧй делӧ йылысь. Сӧмын колӧ быдӧнлы волывлыны, кывзыны да уджавны. Беседаяс бӧрын позьӧ кутчысьны и мукӧд пӧлӧс уджӧ. Тадзи вермасны лоны, артмыны военнӧй кружокъяс.
Сэсся вывті на омӧля сиктъясын том йӧз кутчысьӧны спортӧ да гимнастикаӧ. Тайӧ уджсӧ колӧ жӧ бура лэптыны. Тайӧ уджсӧ кыпӧдны абу зэв сьӧкыд. Колӧ сӧмын кутчысьны уджас сьӧлӧмсянь да нуӧдны. Тайӧ уджас бара жӧ колӧ медвойдӧр кутчысьны запасын сулалысь командиръяслы да красноармеечьяслы.
Гӧрд армиялы кӧкъямысӧд во тырӧмсянь быдлаын колӧ кутчысьны велӧдны став уджалысь йӧзсӧ военнӧй делӧӧ.
