ТАЙӦ ТӦЛЫСЬЫН 23-ӧд ЛУНЫН КРАСНӦЙ АРМИЯЛЫ ТЫРӦ КӦКЪЯМЫСӦД ВО
Ӧкмысӧд во вылӧ петіс рабочӧйяслӧн да крестьяналӧн ас ки улас олӧмыслысь тӧлк нуӧдӧмсӧ босьтӧмлы. Кӧкъямысӧд во тырӧ Краснӧй армиялӧн Сӧвет правительствоӧс дорйӧмлы. Уджалысь йӧз шея вылын олысьяс эз вермыны вензьытӧг сетчыны, ковмис уна вир да лов пуктыны найӧс оружйӧӧн вермытӧдз.
Власьт босьтігӧн, сійӧс дорйигӧн став нартитӧм йӧз пӧрыссянь томӧдз оружйӧӧн сувтісны воча важ олӧмсӧ дорйысьяслы. Повтӧм рабочӧйяслысь да крестьяналысь олӧмсӧ радейтысь войтыр пӧвстын унаӧн на эмӧсь ӧнӧдз кисьысь оружйӧ пуктытӧм йӧз, уна войтыр дружинаяссянь, Краснӧй гвардия пыр армияӧдз мунісны.
Оз позь вунӧдны чорыд косьяссӧ гражданскӧй война дырйи, оз позь вунӧдны ас дай бокӧвӧй капиталистъяслысь миян вылӧ уськӧдчылӧмсӧ. Вунӧдтӧг миян вынным чукӧрмӧ, вунӧдтӧг миянлӧн Краснӧй армияӧс радейтӧмыс содӧ.
Сьӧкыд вӧлі вензьыны Краснӧй армиялы капиталистъяскӧд. Тшыг нисьӧ пӧт, пасьтӧм, кутшӧмсюрӧ оружйӧӧн, вентӧг, венӧмӧн, гражданскӧй война би пыр муніс миян Краснӧй армия венӧмӧдз. Унаӧн ловсӧ, здоровйӧсӧ пуктісны Рабочӧй-Крестьянаса власьт дор сулалігӧн, уна семья вердысь-юкталысьтӧг колины.
Краснӧй армия капиталистъясӧс веніс, Краснӧй армия пыдди тшӧктіс пуктыны Сӧвет правительствоӧс капиталист государствояслы.
Но пыдди пуктӧм Сӧвет правительствоӧс оз кусӧд зык капиталист государствояскӧд. Капиталистъяс оз радейтны рабочӧйяслысь да крестьяналысь натӧг олӧм лӧсьӧдӧм, найӧ некор оз вермыны раммыны. Ковмас миянлы пыр югыда видзӧдны — оз-ӧ кутшӧмкӧ капиталист государство миян вылӧ кыпӧдчы, оз-ӧ кодкӧ кӧсйы торкны миянлысь олӧм бурмӧдӧмсӧ.
Ми косясьны огӧ кӧсйӧ, ми мирӧн кӧсъям асьным овмӧс кыпӧдны, сӧмын капиталистъяс мӧд ног думайтӧны, пыр найӧ миян вылӧ пиньнысӧ кеслӧны.
Медым весьшӧрӧ лоӧ налӧн пиньнысӧ кеслӧмыс, медым ми вермам повтӧг кыпӧдны овмӧс, вӧчны выль олӧм, ёнмӧдам Краснӧй армияӧс лыд лэптытӧг выль бур военнӧй кӧлуйӧн! Медым чорыд гаддя киа йӧзӧс, Сӧвет власьтӧс радейтысьясӧс кадтӧг эз су капиталистъяскӧд кось, велӧдчам ставным оружйӧӧн дорйыны ассьыным олӧмнымӧс!
