ШОГЪЯС

Ок, коли гажа олӧм,
Том олӧм — югыдлун;
Ме тӧда гажа вадор:
Сэн колли уна лун. | 2-ысь.
Роч акань, менам мусук — 
Зэв лӧсьыд, мича ныв,
Ме дінӧ вӧлі локтас,
Сэн босьтас сьыланкыв. | 2-ысь.
Ме ёна сійӧс тӧдлі,
Эг кольлы сытӧг рыт,
Пыр кыкӧн сыкӧд ветлі — 
Эг тӧдлы гажлысь лыд. | 2-ысь.
Эз дона нылӧй дӧзмыв,
Эз коньӧр туйсьыс кеж:
Эз некор мӧдӧс радейт,
Эз оланногсӧ веж. | 2-ысь.
Сідз овны кӧсйим кузя,
Ӧтвылысь кольны нэм,
Да кыптіс ыджыд война:
Тшӧтш мунны лои мем. | 2-ысь.
Сэк нылӧй кутіс шуны:
«Тэ менсьым кывзан он?
Эн некор менӧ вунӧд,
Эн эновт, муса зон!» | 2-ысь.
Ме сылы шуи воча:
«Эн, мися, синва кисьт,
Эн, зарни нылӧй, шогсьы,
Тэ гижлыв меным висьт. | 2-ысь.
Кор косьлӧн воас помыс — 
Тэ дінӧ локта бӧр;
Тэ сідзжӧ менӧ виччысь
Тыр гажӧн, сьӧлӧмшӧр». | 2-ысь.
Сы бӧрын кузя ветлі,
Йӧз дінын вӧлі пыр;
Дыр бӧрын локті гортӧ — 
Ме чайті, гаж оз быр... | 2-ысь.
Сэк менам мича нылӧй
Эз важ моз паныд пет,
Эз важ моз менӧ окав,
Эз веськыд кисӧ сет. | 2-ысь.
Ме пыр жӧ сэки кывлі,
Мый менам гӧтырпу
Мӧд во нин верӧс сайын — 
Оз аддзыв чужан му; | 2-ысь.
Мый эньыс-айыс мырдӧн
Мӧд сиктӧ сетіс сэк;
Сы кадсянь менам дона
Ме понда шогсьӧ век... | 2-ысь.
Со кутшӧм пӧрысь йӧзлӧн
Юр вемыс лоӧ важ:
Ас чужтӧм-быдтӧм нывлысь
Нэм кежлӧ воштас гаж. | 2-ысь.
Со кысянь быри гажыс — 
Нэм кежлӧ суис шог;
Ас садьӧс мукӧддырйи
Ме тӧда нисьӧ ог... | 2-ысь.